„Рајанер“ со предупредување за нов раст на трошоците

„Рајанер“ предупреди на зголемени трошоци во 2026 година доколку незаштитените цени на авионското гориво останат на сегашното ниво, како и поради повисоките сметки за гориво, екипаж и одржување на авионите.

Ирската авиокомпанија соопшти дека трошоците по единица за фискалната 2027 година би можеле да се зголемат за среден едноцифрен процент, додека цената за 20 проценти од нејзините незаштитени потреби за гориво нагло пораснала. „Рајанер“ за оваа година обезбеди 80 проценти од своето гориво по цена од 67 долари за барел, што ќе ја заштити добивката и ќе обезбеди предност во однос на другите превозници, беше објавено во понеделникот.

Сепак, авиопревозникот наведе дека е „уште прерано“ за давање какви било значајни прогнози за добивката поради значителната нестабилност на цените и снабдувањето со гориво, како и недостигот од јасност околу тоа колку долго ќе трае конфликтот на Блискиот Исток.

Сметката за гориво на овој авиопревозник се зголемила за „неколку стотици милиони“ евра, изјави во интервју финансискиот директор Нил Сорахан, без да навлегува во детали.

Војната на Блискиот Исток ги зголеми трошоците за гориво, што во овој квартал силно ја оптовари добивката на многу авиопревозници. Европските традиционални превозници, како ИАГ (сопственик на „Бритиш ервејс“) и „Луфтханза“, известија за зголемување на трошоците за гориво за околу две милијарди, односно 1,7 милијарда евра.

За годината што заврши на 31 март, добивката по оданочување без вонредни ставки изнесувала 2,26 милијарди евра, со што бил надминат целниот опсег на компанијата меѓу 2,13 и 2,23 милијарди евра, соопшти „Рајанер“. Приходите на годишно ниво пораснале за 11 проценти, на 15,5 милијарди евра.

Во авиоиндустријата расте загриженоста околу достапноста на авионското гориво во текот на главната патничка сезона, бидејќи бродскиот сообраќај низ Ормускиот Теснец останува ограничен. „Рајанер“ соопшти дека Европа е добро снабдена со гориво благодарение на испораките од САД, Норвешка и Западна Африка.

Се очекува еколошките даноци на ЕУ оваа година дополнително да се зголемат за 300 милиони евра, а исто така се договорени и нови „значителни зголемувања на платите на екипажот“. Задржувањето на постарите авиони и одржувањето за моторите „ЦФМ лип“ исто така би требало да придонесат за повисоки трошоци.

Економската неизвесност поради повисоките цени на нафтата, загриженоста околу недостигот од гориво и инфлаторните ризици доведоа до намалување на цените на билетите во последните неколку недели, соопшти „Рајанер“. Иако авиокомпанијата претходно очекуваше летните билети да бидат нешто поскапи во однос на минатата година, цените во вториот квартал сега остануваат непроменети. Од авиокомпанијата порачаа дека очекуваат оваа година да превезат 216 милиони патници, што е четири проценти повеќе од лани.

Во меѓувреме разговорите за продолжување на договорот на главниот извршен директор Мајкл О’Лири за дополнителни пет години, до 2032 година, се речиси завршени и компанијата во наредните денови ќе разговара со акционерите, наведе „Рајанер“.

„Има огромна енергија, сака да работи“, рече Сорахан, мислејќи на О’Лири. „Управниот одбор многу сака да го задржи.“