Прва година без легендарниот Бафет - како „Беркшир“ го менува курсот

Во првото тримесечје од 2026 година „Беркшир Хатавеј“ (Вerkshire Hathaway) доста го промени своето портфолио. Во период кога компанијата повеќе не ја води легендарниот инвеститор Ворен Бафет, бројот на вложувања е намален од 42 на 29, покажуваат јавно објавените податоци за портфолиото.

Најмногу внимание привлекоа неколкуте целосни излегувања од познати компании. „Беркшир“, меѓу другото, целосно го продаде уделот во „Амазон“, „Виза“, „Мастеркард“ и „Јунајтедхелт“ (UnitedHealth Group).

Од друга страна, „Беркшир“ отвори неколку нови позиции. Најголема меѓу нив е купувањето акции на авиокомпанијата „Делта ер“ (Delta Air Lines), вредно околу 2,65 милијарди долари. Нова позиција е и купувањето акции на трговскиот синџир „Мејсис“ (Macy's), но станува збор за значително помало вложување, вредно околу 55 милиони долари.

Во компанијата „Алфабет“ (Alphabet (Google)), „Беркшир“ речиси тројно ја зголеми својата позиција, од 5,6 на 15,6 милијарди долари. Трипати го зголеми и вложувањето во весниците „Њујорк тајмс“ (The New York Times Company) и тој влог сега вреди околу 1,2 милијарда долари.

 

 

Истовремено го намали уделот во нафтениот гигант „Шеврон“ (за 35 проценти помалку акции), како и во производителот на пиво, вино и жестоки пијалаци КБ (Constellation Brands), и тоа за дури 95 проценти помалку акции.

Најголема поединечна инвестиција останува „Епл“ (вредна околу 57,8 милијарди долари), а следуваат  „Американ експрес“ (45,9 милијарди), „Кока-кола“ (30,4 милијарди), Банката на Америка (25 милијарди) и „Шеврон“ (17,5 милијарди долари).

Вредноста на сите инвестиции на „Беркшир“ изнесува околу 263 милијарди долари.

 

 

„Беркшир“ и во првото тримесечје од оваа година повеќе продавал отколку што купувал, што значи дека неговиот имот во готовина и понатаму расте и достигна нов рекорд. На крајот од првото тримесечје компанијата имала околу 397 милијарди долари готовина и краткорочни американски државни обврзници, што е 6,5 проценти повеќе отколку на крајот од минатата година и повеќе од вредноста на акциските вложувања на компанијата.

Кој е Пророкот од Омаха Ворен Бафет важи за еден од најуспешните инвеститори на сите времиња, поради што го доби прекарот Пророкот од Омаха. Бафет во текот на шест децении ја трансформира „Беркшир Хатавеј“ од пропадната текстилна компанија во еден од најголемите конгломерати во светот, и тоа со вложувања во компании како што се „Епл“, „Кока-кола“, „Американ експрес“ и многу други. Бафет се прослави со долгорочно вложување во компании со силни брендови, стабилни парични текови и добро управување. Неговата филозофија се заснова на принципите на таканареченото вредносно инвестирање, кое го разви неговиот ментор Бенџамин Грахам. Освен по инвестициските успеси, Бафет е познат и по релативно скромниот начин на живот, како и по тоа што поголемиот дел од своето богатство го дал во добротворни цели. „Беркшир Хатавеј“ долго време ја водеше заедно со деловниот партнер и пријател Чарли Мангер, кој почина кон крајот на 2023 година.

Првото тримесечје од 2026 година беше првото воопшто под водство на новиот извршен директор Грег Абел, кој ја презеде позицијата од легендарниот Бафет по неговото повлекување кон крајот на 2025 година.

Бафет го водеше „Беркшир“ повеќе од шест децении, а во текот на тој период компанијата стана една од најголемите и највредните во светот.

Абел ѝ се приклучи на компанијата во 2000 година, кога „Беркшир“ купи мнозински удел во енергетската компанија МАЕ (MidAmerican Energy), каде што Абел веќе работеше како водечки менаџер. Подоцна стана директор на таа компанија, која денес се вика БХЕ (Berkshire Hathaway Energy).

Бафет во 2018 година го унапреди Абел во потпретседател на „Беркшир Хатавеј“ за сите дејности што не се поврзани со осигурување, а во 2021 година и јавно го означи како свој наследник. Функцијата извршен директор на компанијата официјално ја презеде во јануари 2026 година.