Шефот на „Голдман“ директно му се обрати на Маск — сака да го води ИПО-то на „Спејс Икс“

Додека „Голдман Сакс“ (Goldman Sachs Group) ја водел кампањата за преземање на водечката улога во иницијалната јавна понуда на „Спејс Икс“ (SpaceX), извршниот директор на банката Дејвид Соломон отворил нов канал за комуникација со милијардерот и сопственик на ракетната компанија, испраќајќи му директна порака на Илон Маск.

Додека банките се натпреварувале која ќе ја добие водечката улога во ова ИПО, Соломон со својот тим директно му испратил порака на Маск преку мрежата Икс, велат анонимни извори.

Потегот на Соломон помогнал да се истакне посветеноста на банката кон Маск и разновидните бизниси на непредвидливиот милијардер, меѓу кои е и „Икс еј-ај“ (xAI). Овој чекор покажува како инвестициските банки се обидуваат да направат сè што е во нивна моќ за да ја добијат наклонетоста на клиентите.

Банките со месеци се борат за водечката позиција во иницијалната јавна понуда на „Спејс Икс“, кој цели кон вреднување поголемо од два билиона долари и прибирање 75 милијарди долари, како што претходно објави „Блумберг“. Со таа големина, оваа зделка лесно би го надминала досегашниот рекорд за средства прибрани преку иницијална јавна понуда. Се очекува ова да биде и прва во низата долгоочекувани јавни понуди во 2026 година, кои би можеле да им донесат огромни приходи на банките.

„Морган Стенли“ (Morgan Stanley) долго време важеше за главен банкар на Маск, откако со години стоеше зад него и ја задржа довербата во неговата исклучително ризична понуда за преземање на „Твитер“, денес познат како Икс. Фактот што „Голдман Сакс“ беше наведен пред својот ривал во документацијата за ИПО беше причина за големо славење во „Голдман“.

Банката има повеќегодишна соработка со „Спејс Икс“. Работата околу ИПО-то ја водат некои од најискусните банкари на „Голдман“, меѓу кои Ден Дис, Ким Познет и Дејвид Лудвиг. Клучна фигура во операцијата била и Сузи Шер, долгогодишна инвестициска банкарка во „Голдман“, која сега е висок советник.

Во документот со условите на зделката, „Морган Стенли“ навел дека двете банки се заеднички координатори на ИПО-то, со напомена дека редоследот на наведување е по азбучен ред, според лица запознаени со документот. Се очекува излегувањето на „Спејс Икс“ на берза да им донесе на банките надоместоци што далеку ги надминуваат вообичаените износи за вакви зделки. Освојувањето на посакуваната „lead-left“ позиција им овозможува на банките предност кај идните клиенти и престиж пред инвеститорите.

Дејвид Соломон е познат по користење необични методи за обезбедување зделки, а еден пример стана дел од легендите на инвестициското банкарство во „Голдман Сакс“. Главниот извршен директор, кој во тоа време раководеше со одделот за инвестициско банкарство, се појавил со тим облечен во опрема од брендот „Лулулемон“ (Lululemon) за да обезбеди мандат за ИПО-то на компанијата за спортска облека во 2007 година.

Bloomberg

„Морган Стенли“ со години го градеше односот со Маск. Маск минатата година именува поранешен банкар од „Морган Стенли“ за главен финансиски директор на компанијата „Икс еј-ај“. Џаред Бирчал, поранешен менаџер во „Морган Стенли“, долго време е десна рака на овој претприемач и управува со неговото богатство.

Сепак, друг истакнат банкар на „Морган Стенли“, Мајкл Грајмс, беше клучен за тој однос, помагајќи во водењето на зделките на банката при купувањето на „Твитер“ од страна на Маск во 2022 година.

Тоа не беше едноставна зделка. „Морган Стенли“ ризикуваше огромни загуби откако му останаа милијарди долари што мораше да ги обезбеди за финансирање на трансакцијата. Инвеститорите се двоумеа да го преземат ризикот, оставајќи го долгот заглавен во билансите на банките.

На крајот, групата предводена од „Морган Стенли“ успеа да го префрли ризикот, бидејќи стравувањата околу ситуацијата се намалија, делумно благодарение на враќањето на Трамп на функцијата минатата година и истакнатата улога на Маск во Вашингтон.

Потоа Грајмс го следеше Маск во Вашингтон за да работи за администрацијата на Трамп. Подоцна, на почетокот од оваа година, се врати во „Морган Стенли“, што предизвика тревога во „Голдман Сакс“.

Обезбедено финансирање

Од друга страна, Илон Маск и „Голдман Сакс“ имаа променлив однос. Уште во 2018 година, по озлогласениот твит на Маск „funding secured“, во кој тврдеше дека обезбедил пари за да ја повлече „Тесла“ од берзата и да ја претвори во приватна компанија, милијардерот јавно посочи дека „Голдман“ му е финансиски советник. Тоа предизвика хаос во банката, бидејќи формално немала договор за таква улога. Подоцна „Голдман“ сепак се согласи да го советува Маск.

Високи банкари од „Голдман“ подоцна се сретнале со Маск во неговата резиденција за да претстават начини на кои би можеле да обезбедат средства за неговиот амбициозен план. Потоа, кога Маск тргна во купувањето на „Твитер“, покрај себе го имаше „Морган Стенли“. „Голдман“, симболично, застана на страната на „Твитер“ за да помогне во одбраната од непријателското преземање.

Растот на „Спејс Икс“

Во последните години „Спејс Икс“ прерасна во една од највлијателните компании во вселенската индустрија, со државни договори вредни милијарди долари и значително политичко влијание. Илон Маск беше меѓу бизнисмените кои минатата недела патуваа со Доналд Трамп во Кина за да се приклучат на разговорите со Шји Џјинпинг.

Инаку, Соломон и претходно бил подготвен да користи неконвенционални методи за да привлече внимание и да обезбеди зделки. Иако со години не бил активен на мрежата Икс, во минатото често ги користел социјалните мрежи за промоција на својот имиџ. Во првите години како извршен директор, на Инстаграм, во сопственост на „Мета“ (Meta), објавуваше и деловни содржини и музички настапи како диџеј, пред во 2022 година да престане со таквите објави.

Како што неодамна изјави во еден подкаст, немал проблем јавно да ги промовира своите активности.

„Не бев јас тој што бараше да не се зборува за тоа, туку луѓето од мојот тим сметаа дека тоа не треба да биде тема“, рече Соломон.

Во подготовката на текстот помогна и Бејли Липшулц.