text size
„Енвидија“ (Nvidia Corp.) влегува на пазарот на персонални компјутери со нов чип чија цел е да ја намали доминацијата на технологијата на „Интел“ (Intel Corp.) во овој сегмент и да ги модернизира компјутерите за ерата на вештачката интелигенција.
Од оваа есен, новиот РТ-екс Спарк супершип ќе дебитира во лаптоп и десктоп компјутери на водечки производители, вклучително и „Дел“ (Dell Technologies Inc.) и „Леново“ (Lenovo Group Ltd.), изјави главниот извршен директор Џенсен Хуанг на саемот Компјутекс во Тајпеј. Производот претставува комбинација од микропроцесор и графички чип, развиен со помош на „Медиатек“ (MediaTek Inc.), а ќе работи на оперативниот систем Виндоус за Арм на „Мајкрософт“ (Microsoft Corp.).
Сега, како доминантен играч во дата-центрите, Енвидија повторно се обидува да се пробие на пазарот на процесори за персонални компјутери, откако беше дел од иницијатива што згасна пред повеќе од една деценија. Овојпат компанијата настапува од многу посилна позиција и може да одвои повеќе ресурси од кој било актуелен или потенцијален конкурент, како што е „Квалком“ (Qualcomm Inc.) со својата линија Снепдрагон производи за персонални компјутери. За Енвидија, овој потег е дел и од напорите да ја задржи својата централна улога во развојот и примената на ВИ.
Компанијата со седиште во Санта Клара, Калифорнија, соопшти дека првите лаптопи со РТ-екс Спарк ќе бидат насочени кон премиум сегментот и ќе имаат цел да ги отстранат компромисите што ги нуди конкуренцијата. Енергетската ефикасност на чипот ќе им овозможи на производителите да понудат исклучително моќни машини кои истовремено ќе бидат тенки и лесни. Подоцнежните верзии на технологијата ќе покриваат и поширок ценовен спектар, соопшти Енвидија.
Претходно, подлабоко навлегување на пазарот на персонални компјутери ќе претставуваше големо проширување на деловниот опфат и можностите за Енвидија. Но денес, линијата чипови за дата-центри носи приходи што ги надминуваат комбинираните приходи на нејзините најблиски конкуренти. Продажбата на Енвидија во последниот квартал беше приближно еднаква на годишните приходи што „Интел“ и „АМД“ (Advanced Micro Devices Inc.) ги остварија во текот на минатата година.
Сепак, инвеститорите кои ја подигнаа вредноста на акциите на Енвидија поради експлозивниот раст на ВИ веројатно ќе го поздрават проширувањето на присуството на компанијата во производите преку кои технологијата директно стигнува до крајните корисници. И покрај растот што ги надминува другите производители на чипови, акциите на Енвидија оваа година заостануваат зад референтниот индекс Philadelphia Stock Exchange Semiconductor Index.
РТ-екс супершип ќе содржи централен процесор со до 20 пресметковни јадра и графички процесор од генерацијата Блеквел со 6.144 јадра. Двата елемента ќе користат заедничка вградена меморија, што ќе им овозможи поефикасно да работат со големи ВИ модели и напредни видеоигри. За комуникација ќе го користат интерфејсот Енвилинк на Енвидија, со што дел од технологијата на дата-центрите ќе се пренесе во персоналните компјутери. Производството на чипот ќе го врши „ТСМЦ“ (Taiwan Semiconductor Manufacturing Co.) со користење на нејзината 3Н производна технологија.
Енвидија соопшти дека со години соработува со Мајкрософт за подготовка на новите уреди и обезбедување софтверска поддршка што конечно треба да овозможи технологијата на „Арм“ (Arm Holdings Plc) пошироко да се наметне во светот на Виндоус персоналните компјутери. „Мајкрософт“ и „Квалком“ повеќе од една година промовираат слични компјутери, но со ограничен успех. Надвор од линијата Мек на „Епл“ (Apple Inc.), најголемиот дел од персоналните компјутери користат процесори произведени од Интел или АМД. Предноста на Арм во однос на овие компании е значително подобрата енергетска ефикасност, но архитектурата досега заостануваше во компатибилноста со софтверот.
Новите компјутери базирани на технологија на Енвидија ќе можат подобро да се справуваат со ВИ модели и функции во широко користени софтверски решенија. На пример, Фотошоп на „Адобе“ (Adobe Inc.) се приспособува за подобро да реагира на ВИ команди за генерирање слики и видео содржини. Новите уреди ќе ги подобрат и можностите за видеоигри, овозможувајќи им на лаптопите да се справуваат со најсложените видеоигри соопшти Енвидија.
Општо земено, персоналните компјутери базирани на Енвидија ќе можат безбедно да извршуваат големи ВИ модели, нудејќи им на корисниците лесно применливи контроли за тоа до кои податоци и софтвер има пристап системот. Таквите заштитни механизми ќе ја забрзаат трансформацијата на персоналните компјутери во лични асистенти кои ќе прават многу повеќе отколку само да одговараат на кориснички команди. Вообичаени активности како пребарување електронска пошта, но и посложени задачи како откривање и отстранување грешки на интернет-страници, ќе станат многу полесни, според Енвидија.
Компанијата одби да објави споредби на перформансите со постојните и идните уреди базирани на конкурентски технологии. Тие податоци ќе бидат објавени кога новите машини ќе бидат подготвени за продажба, соопшти Енвидија. Компанијата не очекува тековните ограничувања во снабдувањето со компоненти во индустријата за чипови да влијаат врз достапноста на новите уреди.
.webp){kind=icon}
