text size
„Сони пикчрс ентертејнмент“ (Sony Pictures Entertainment) вложува 100 милиони долари во „Косм“ (Cosm), оператор на сали со големи екрани на кои се прикажуваат филмови и спортски настани.
Рави Ахуја, главниот извршен директор на „Сони пикчрс“, во рамки на овој договор ќе му се приклучи на Управниот одбор на „Косм“, се наведува во соопштението објавено во средата.
Основан во 2020 година, „Косм“ нуди храна и распоред на седење со високи маси и сепареа, осмислен за да создаде посоцијално искуство при гледањето филмови. Огромните закривени екрани треба да им овозможат на посетителите чувство дека се целосно внесени во случувањата на екранот. „Косм“ моментално има сали во „Холивуд парк“ (Hollywood Park), северен Далас и центарот на Атланта. Компанијата планира во септември да отвори нова локација во Детроит, на почетокот на следната година и во Кливленд, а во план се и други локации во САД и во странство, се наведува во соопштението.
Медиумскиот и спортскиот сектор на „Ен-би-си универзал“ (NBCUniversal), кој е во сопственост на „Комкаст“ (Comcast Corp.), претходно склучи договор за прикажување натпревари од англиската Премиер лига и од конференцијата „Биг Тен“ во американски фудбал во салите на „Косм“ во Лос Анџелес и Далас. Во „Косм“ се прикажуваа и филмовите „Матрикс“, „Вили Вонка и фабриката за чоколади“ и „Хари Потер и Каменот на мудроста“, кои ги дистрибуира филмското студио „Ворнер брос“ (Warner Bros. Discovery Inc.).
Оваа инвестиција на „Сони пикчерс“, подружница на јапонската „Сони груп“ (Sony Group Corp.), под чија капа се франшизите „Спајдермен“ и „Џуманџи“, следува по неколку неодамнешни иницијативи на холивудските студија, кои се поврзуваат со компании што нудат иновативни концепти за работење на киносалите.
„Сфер ентертејнмент“ (Sphere Entertainment Co.), кој управува со огромната купола со кружен екран изградена за повеќе од две милијарди долари во Лас Вегас, беше домаќин на концерти во живо на групите „Ју ту“ (U2) и „Иглс“ (Eagles), а прикажуваше и филмови како „Волшебникот од Оз“ и „Разгледница од Земјата“ (Postcard From Earth) на режисерот Дарен Аронофски.
„Сони“ во 2024 година го презеде синџирот кина „Аламо драфтхаус“ (Alamo Drafthouse), кој на посетителите им нуди вечера за време на филмските проекции. Во исто време, акциите на „Ајмакс“ (Imax Corp.), кој ја лиценцира својата технологија за големи екрани на синџири кина, значително пораснаа во изминатите месеци, поттикнати од рекордните приходи на светските кино-благајни.
„Косм“, со седиште во Лос Анџелес и предводен од главниот извршен директор Џеб Тери, во 2024 година обезбеди 250 милиони долари од инвеститори, меѓу кои сопственикот на НБА тимот „Кливленд кавалирс“ Ден Гилберт и финансиерот Марк Ласри.
.webp){kind=icon}
