Добавувачите на производителите на чипови чекаат големи нарачки, нивните акции рушат рекорди

Акциите на компаниите што произведуваат опрема и материјали што потоа се користат за производство на чипови растат оваа недела, бидејќи зголемените инвестиции од водечките производители на чипови во Јужна Кореја го зајакнуваат оптимизмот на инвеститорите.

„АСМЛ“ (ASML Holding NV) затвори во вторникот со пораст од 6,8 отсто во Амстердам, достигнувајќи нов рекорд. Американските конкуренти „Аплајд Матириалс“ (Applied Materials Inc.) и „Кеј ел еј“ (KLA Corp.) пораснаа за повеќе од шест и девет отсто на денешното тргување  во Њујорк. На дводневна основа, трите акции се меѓу најдобрите во Philadelphia Semiconductor Index, кој порасна  7,5 отсто изминативе два дена.

Bloomberg

 

Најновата динамика во секторот дојде откако „Самсунг Електроникс“ (Samsung Electronics Co.) и „СК Хајникс“ (SK Hynix Inc.) објавија планови за изградба на по две фабрики за чипови во Јужна Кореја за вкупно 516 милијарди долари. Додека ги зголемуваат капацитетите за да ја задоволат растечката побарувачка за мемориски чипови, инвеститорите се обложуваат дека „АСМЛ“ и неговите конкуренти, кои  испорачуваат опрема на двете фирми, ќе имаат корист.

Пошироко, американскиот репер индекс за индустријата за чипови е пораснат за 100 отсто во првата половина од 2026, бидејќи се движи кон најдобриот квартал во историјата. Сепак, неодамнешните движења дојдоа со зголемена волатилност: Philadelphia Semiconductor индексот минатата недела изгуби речиси 8 отсто, што е неговиот најлош неделен резултат за повеќе од една година.

Сè повеќе аналитичари стануваат попозитивни во однос на производителите на опрема за чипови во јуни, очекувајќи врвните производители на чипови да го забрзаат купувањето опрема. Тоа го вклучува и аналитичарот на „Сусквехана“ (Susquehanna), Мехди Хосеини, кој сега предвидува дека пазарот на опрема и материјали за производство на чипови ќе достигне 250 милијарди долари во 2028 година, над претходната цел. Аналитичарот ја зголеми целната цена на „АСМЛ“ на највисока меѓу брокерите, гледајќи раст од над 35 отсто во однос на  затворањето во вторник.

Меѓу другите брокери, „УБС“ (UBS Group AG) на 10 јуни, исто така, предвиде дека вкупниот пазар на опрема за чипови ќе достигне 250 милијарди долари во 2028 година, додавајќи дека загриженоста на инвеститорите околу снабдувањето со алатки за литографија е претерана. „Џеј Пи Морган“  во белешка од 17 јуни, исто така, ги зголеми проценките за големината на пазарот.

Следно, инвеститорите веројатно ќе обрнат големо внимание на заработката на „АСМЛ“ што треба да се објави на 15 јули. Индикации за капитални трошоци од „Тајван Семикондактор“ (Taiwan Semiconductor Manufacturing), кои веројатно ќе бидат соопштени на конференцискиот повик за заработката на производителот на чипови еден ден подоцна, исто така ќе бидат внимателно следени.