Извршната директорка на Ексбокс, Аша Шарма, во интерно обраќање до вработените оцени дека сегашниот бизнис-модел повеќе не е одржлив, наведувајќи дека профитните маржи на Ексбокс се меѓу три и десет пати пониски од оние на конкурентите.
„Нашето работење денес не е здраво. Мораме да го ресетираме Ексбокс“, порача Шарма.
Според нејзиниот допис, веднаш ќе бидат укинати 1.600 работни места во Ексбокс, а уште толку ќе исчезнат во текот на следната година. Паралелно, „Мајкрософт“ ќе отпушти дополнителни 3.200 вработени во други делови од компанијата, главно во секторите за продажба.
Директорката за човечки ресурси Ејми Колман објасни дека отпуштањата се резултат на промените во начинот на развој на производите, како и на изменетите потреби на клиентите. Таа најави дека реорганизацијата нема да заврши само со Ексбокс, туку дека слични процеси ќе следуваат и во други делови на компанијата.
Реорганизацијата претставува најголемиот потег на Шарма откако во февруари ја презеде функцијата извршен директор на Ексбокс. И покрај огромните инвестиции, меѓу кои и аквизицијата на „Активижн Близард“ (Activision Blizzard) вредна 69 милијарди долари во 2023 година, Ексбокс не успеа да пласира доволен број комерцијално успешни игри, продажбата на конзоли значително ослабе, а растот на претплатничката услуга „Гејм пас“ (Xbox Game Pass) забави.
Bloomberg
Минатиот месец Шарма откри дека интерниот показател за профитабилност на компанијата паднал на само три проценти, додека годишните приходи бележат остар пад. Според неа, Ексбокс во типична година губел 64 центи на секој долар вложен во работењето, што, како што нагласи, повеќе не може да продолжи.
Како дел од новата стратегија, „Мајкрософт“ ќе ги продаде студијата НТ (Ninja Theory), познато по серијалот „Хелблејд“ (Hellblade), и УЛ (Undead Labs), креаторот на „Стејт од дикеј“ (State of Decay), додека тие ќе продолжат да работат на актуелните проекти во соработка со Ексбокс. Студијата ДФ (Double Fine) и КГ (Compulsion Games) ќе бидат издвоени од компанијата и повторно ќе функционираат како независни студија, при што ќе ги задржат правата врз сопствената интелектуална сопственост.
Во меѓувреме, француското студио АС (Arkane Studios), кое ја развива играта „Блејд“ (Blade), ќе влезе во процес на консултации за можни стратешки опции, меѓу кои се продажба или издвојување од Ексбокс. Поради строгите француски закони за заштита на вработените, овој процес ќе трае подолго.
Компанијата „Зенимакс“ (ZeniMax), која е дел од Ексбокс, исто така ќе помине низ значителна реорганизација и во иднина ќе се фокусира на своите најуспешни франшизи, меѓу кои „Фолаут“ (Fallout), „Елдер скролс“ (The Elder Scrolls), „Дум“ (Doom), „Квејк“ (Quake) и „Волфенштајн“ (Wolfenstein). Воедно, Ексбокс ќе го намали бројот на раководни позиции и ќе воведе поцентрализиран модел на управување со развојните студија, со цел побрзо развивање и лансирање нови производи.
Во „Мајкрософт“ нагласуваат дека ниту еден јавно најавен проект нема да биде откажан поради реорганизацијата и дека отпуштањата ќе ја опфатат целата организација, вклучително и студијата што остануваат во составот на Ексбокс.
Компанијата веќе две години спроведува мерки за намалување на трошоците, додека истовремено инвестира десетици милијарди долари во развој на инфраструктура за вештачка интелигенција. Само во текот на минатата година „Мајкрософт“ отпушти околу 15.000 вработени, а новиот бран кратења ја потврдува тенденцијата големите технолошки компании да го намалуваат бројот на вработени за да ги пренасочат ресурсите кон најбрзорастечките сегменти на своето работење.
„Овие промени не се насочени кон помал Ексбокс, туку кон неговата поголема иднина“, порача Шарма, додавајќи дека целта е платформата во иднина да достигне една милијарда активни играчи дневно.
.webp){kind=icon}
