„Виза“ отпушта 7 отсто од вработените

„Виза“ укинува околу 2.600 работни места како дел од напорите на главниот извршен директор Рајан Мекинерни да ја направи компанијата поефикасна во услови на сè поостра конкуренција во платежната индустрија.

Намалувањето претставува околу 7 отсто од вкупната работна сила, а најмногу ќе ги погоди тимовите за технологија и развој на производи, навел Мекинерни во интерно известување до вработените во кое „Блумберг“ имаше увид.

„Имам силно уверување дека го правиме она што е исправно за ‘Виза’, за нашите клиенти и партнери, додека продолжуваме да се фокусираме на зголемување на ефикасноста низ целата компанија со цел повторно да инвестираме во можностите со најголем потенцијал“, напишал тој.

„Виза“, која треба да ги објави кварталните финансиски резултати по затворањето на американските берзи во вторник, имаше околу 34.100 вработени на крајот на последната фискална година, што е повеќе од тројно зголемување во споредба со состојбата пред една деценија. Многу од нејзините финтек-конкуренти во последните месеци најавија уште подлабоки кратења на работни места.

„За да ги искористиме можностите што се пред нас и најдобро да ја позиционираме ‘Виза’ да ја предводи оваа трансформација, мораме постојано да го унапредуваме начинот на кој работиме“, напишал Мекинерни. „Вештачката интелигенција исто така помага да се забрза оваа еволуција и да се обликува начинот на кој се извршува работата во ‘Виза’.“

Иако вештачката интелигенција се користи за намалување на рутинските задачи и забрзување на развојот на производи, таа не била единствената причина за одлуката на „Виза“, според лице запознаено со размислувањата на компанијата.

„Виза“ планира повторно да инвестира во сегментите на потрошувачки плаќања, комерцијални плаќања и трансфер на средства, како и во услуги со додадена вредност, кои вклучуваат решенија поврзани со стејблкоини, прекугранични трансакции и услуги за деловни клиенти.

„Како резултат на одлуките што ги донесовме во изминатите неколку години, влегуваме во нова ера на трговијата со бизнис кој зема вистински замав“, навел Мекинерни во пораката. „Тоа го гледаме преку континуирано силните финансиски резултати, задоволството на клиентите, ангажираноста на вработените и иновациите што ни овозможуваат да развиваме и пласираме производи подобро и побрзо од кога било досега.“

Акциите на „Виза“ пораснаа за 3,4 отсто од почетокот на годината до понеделникот, што е нешто помал раст во споредба со растот од 3,8 отсто на индексот S&P 500 Financials, кој опфаќа 76 финансиски компании.