Компанијата зад која стои и Федерер со пад на акциите од преку 20 отсто

Акциите на „Он Холдинг АГ“ (On Holding AG) паднаа во вторник по разочарувачката продажба во вториот квартал. Швајцарскиот бренд, имено, воочи освежувањето на својата понуда се воздржа од снижувањето на цените на постарите модели на патики на исклучително промоциски насочениот американски пазар.

Компанијата, поддржана со инвестиција и  од поранешната тениска ѕвезда Роџер Федерер, во вторникот изјави дека нејзината нето продажба по константен девизен курс изнесувала 850,3 милиони швајцарски франци (1,05 милијарди долари). Тоа е под просечната проценка на аналитичарите од 881,4 милиони швајцарски франци.

Акциите паднаа за дури 20,29 проценти на тргувањето во Њујорк на денешното тргување. Од почетокот на годинава акцијата е падната за дури 34 отсто.

Брендот, исто така, малку ја намали својата прогноза за продажба за целата година. Сега очекува раст во „долниот опсег од 20 проценти“, што е намалување од пооптимистичката прогноза од „најмалку 23 проценти“.

Сепак, очекуваниот опсег на продажба по тековните девизни курсеви сега е помеѓу 3,47 милијарди и 3,56 милијарди швајцарски франци, слично на претходната прогноза од 3,51 милијарди франци. Производителот, исто така, малку ја зголеми својата целна бруто маржа за целата година на најмалку 65 проценти од 64,5 проценти.

Попретпазливите изгледи за продажба доаѓаат во време кога „Он“ се бори да ги одржи високи цените на своите патики и нови колекции облека, додека многу брендови се обидуваат да ги привлечат клиентите со попусти. Таа динамика е особено изразена за „Он“ во специјализираните продавници за облека за трчање во САД, најголемиот спортски пазар во светот, рече ко-извршниот директор Дејвид Алеман во едно интервју.

Компанијата беше претпазливa во врска со испораката на постари верзии на своите основни производи до американските трговци на мало пред воведувањето на освежените модели. Брендот веќе бележи „исклучителна“ побарувачка за својот нов модел „клаудмонстер 3“ (Cloudmonster 3), кој се продава за 190 долари и беше претставен во април, рече Алеман.

„Он“ неодамна ја претстави најновата верзија од својата линија „клаудранер“ (Cloudrunner), а во октомври планира да започне со продажба на нов модел, „клаудсурфер“ (Cloudsurfer), третиот дел од својата понуда за попребирливи трчачи. Новите модели ја имаат најновата технологија од пена на „Он“ и препознатливите „облаци“ на компанијата, односно специјално обликувани отвори во ѓоновите.

Нето продажбата во САД се зголемила за 13 проценти по константни девизни курсеви во вториот квартал, што е далеку под растот од 55 проценти во Азиско-пацифичкиот регион и растот од 21 процент во Европа, Блискиот Исток и Африка.

Токму оваа динамика - заедно со фактот дека каналите за продажба директно до потрошувачите на „Он“ беа многу успешни - помага да се објасни зошто „Он“ се спротивстави на трендот на намалување на цените во САД, рече Алеман.

„Нашата визија е да станеме најпрестижниот глобален спортски бренд на многу, многу долг рок“, додаде тој. „Доаѓаат многу иновации, а сега само треба да почекаме тој циклус целосно да се одвива.“

Основан во 2010 година, „Он“ брзо порасна благодарение на своите премиум патики за трчање и проширувањето во области како што се тенис, активности на отворено, тренинг и облека. Компанијата откина пазарен удел од компании како што се „Најк“ и „Пума“ и значително ги надмина тригодишните цели за продажба и профитабилност поставени за 2023 година.

„Он“ на инвеститорите  ќе им презентира нов стратешки извештај кон крајот на септември, рече Алеман.

Иако патиките сè уште обезбедуваат огромно мнозинство од приходите на „Он“, продажбата на облека се зголеми за 56 проценти во вториот квартал по константни девизни курсеви. Бруто маржата на компанијата беше 65,4 проценти, што беше над очекувањата.

Алеман и неговиот партнер коосновач Каспар Копети ја вратија оперативната контрола врз компанијата во мај и станаа ко-извршни директори. Тие ја основаа „Он“ со поранешниот професионален спортист Оливие Бернхард, а нивниот главен фокус е на одржување на брзиот раст, особено во Азија.

Секторот ја изгуби популарноста кај инвеститорите поради растечките геополитички и трговски тензии, обемните намалувања на цените во САД и Европа и загриженоста кај инвеститорите за тоа дали повеќедеценискиот бум на пазарот на патики ќе продолжи.