„Енвидија“ демонстрира финансиска моќ за да ги смири кредитните пазари

Шест од најголемите имиња во финансискиот свет помагаат на „Енвидија“ да ја намали загриженоста кај инвеститорите што со недели се зголемува поради растечките обврски на компанијата за поддршка на бумот во вештачката интелигенција (ВИ).

Првите знаци на олеснување дојдоа откако извршниот директор на компанијата, Џенсен Хуанг, во понеделникот објави дека коалиција од големи инвестициски фирми, меѓу кои „Блекрок“ и „Голдман“ обезбедуваат повеќе од 500 милијарди долари за финансирање на изградбата на ВИ инфраструктура. Групата самостојно ќе ги проценува поединечните зделки и своето ниво на учество, додека придонесот на „Енвидија’“ ќе биде релативно ограничен и ќе се однесува само на дел од проектите.

Идејата е дека надворешниот капитал, внимателната проценка од искусни инвеститори и поддршката од Волстрит ќе помогнат да се намалат стравувањата дека „Енвидија“ создава „балон“ на ВИ средства преку кружно финансирање. За помалку од три недели, индикаторот за кредитниот ризик на производителот на чипови речиси се удвои поради загриженоста дека заемите кон клиентите можат да донесат повеќе продажба денес, но и потенцијални проблеми во иднина ако тие клиенти не успеат.

Bloomberg Mercury

Во вторникот, трошокот за осигурување на долгот на „Енвидија“ од можен банкрот се намали, а обврзниците на компанијата зајакнаа, при што ризичните премии во однос на американските државни обврзници се вратија на нивото од минатата недела.

„Обврската преземена од некои од најголемите фирми на Волстрит е позитивен развој што отстранува дел од неизвесноста околу изградбата на инфраструктурата и идните трошоци на клиентите“, изјави Брет Козловски, портфолио-менаџер во „ГВК инвестмент менаџмент“.

„Енвидија“ е клучен играч во глобалната трка вредна 5,5 билиони долари за профитирање од вештачката интелигенција. Нејзините моќни компјутерски чипови првично беа развиени за графички задачи, но можат истовремено да извршуваат повеќе операции, што ги прави особено корисни за современите центри за податоци.

Огромната побарувачка за овие чипови помогна „Енвидија“ да стане највредната јавно тргувана компанија во светот, со пазарна вредност што надмина 5,2 билиони долари. Сепак, инвеститорите сè повеќе се прашуваат дали клиентите на компанијата се премногу зависни од финансиската поддршка за финансирање на чиповите и центрите за податоци, чија цена значително расте во последните години.

Кон крајот на јули, „Блумберг“ објави дека „Енвидија“ преговара да обезбеди гаранции во вредност до 250 милијарди долари за да му помогне на „Опен еј-ај“ да изнајмува компјутерска моќност од центар за податоци во Охајо, развиен од единица на „Софтбанк“. Тоа би бил еден од најголемите финансиски аранжмани на „Енвидија“ со клиент. Според лица запознаени со случајот, компанијата исто така разговарала за финансирање на 350 милијарди долари од купувањата на нејзини чипови од страна на „Опен еј-ај“ за истиот проект.

Иако оваа вест ги охрабри поддржувачите на ВИ, таа предизвика нови грижи на кредитните пазари околу т.н. кружно финансирање, односно заеми на клиенти кои краткорочно ја зголемуваат продажбата на „Енвидија“, но можат да предизвикаат загуби доколку тие клиенти не успеат.

„Енвидија“ исто така објави партнерство со „СК Груп“ за изградба на повеќе од 2 гигавати центри за податоци на Корејскиот Полуостров, како дел од соработка со јужнокорејскиот конгломерат вредна над половина билион долари. Хуанг подоцна појасни дека најголемиот дел од таа сума се однесува на идни купувања на мемориски чипови од „СК Хајникс“ од страна на „Енвидија“. Компанијата нагласи дека новите 500 милијарди долари надворешен капитал не се поврзани со договорот со „СК Груп“.

Фонд-менаџерите стравуваат дека „Енвидија“ презема ризици преку финансиски аранжмани кои личат на кружно финансирање: позајмување средства на оператори на центри за податоци за тие да купуваат чипови од „Енвидија“, што ја зголемува продажбата сега, но носи ризик од идни загуби ако ВИ инфраструктурата не генерира доволно приходи.

Овие стравувања се одразија на пазарот на кредитни деривати, каде инвеститорите можат да купат вид осигурување што исплаќа средства доколку компанијата не ги исполни своите долговни обврски. Кога загриженоста за можен банкрот расте, расте и цената на оваа заштита.

Кон крајот на јули, цената за петгодишна заштита на долгот на „Енвидија“ достигна дури 82.000 долари годишно за секои 10 милиони долари осигурен главен долг, откако во поголемиот дел од годината се движеше околу половина од тоа ниво. Во вторникот, оваа цена изнесуваше околу 73.000 долари, односно 73 базични поени, што претставува пад од околу 4 базични поени во текот на денот.

Ограничена изложеност

Новиот договор ќе донесе капитал обезбеден од компании како „Аполо глобал менамент“, „Блекстон“, „Брукфилд асет менаџмент“ и „Кеј-кеј- ар“, покрај „Блекрок“ и „Голдман“. Овие фирми самостојно ќе го оценуваат секој проект и ќе одлучуваат дали ќе обезбедат финансирање. Од своја страна, „Енвидија“ соопшти дека воспоставува пазарна платформа преку која независни обезбедувачи на капитал ќе се поврзуваат со корисниците на средствата, нагласувајќи дека нејзината улога првенствено е да обезбеди инфраструктура за ваквите трансакции.

Како резултат на тоа, ќе се создадат „посветени фондови со значителен обем на капитал и по атрактивни услови за клиентите на ‘Енвидија’“, се наведува во соопштението на компанијата.

„Енвидија“ ќе поддржува дел од проектите со гаранции до 25 отсто од вредноста, користејќи механизам познат како гаранција на преостаната вредност (residual value mechanism), чија цел е да ги ограничи загубите доколку некој проект се соочи со проблеми. Компанијата не откри многу детали, но истакна дека нејзините чипови може да се користат од широк спектар клиенти, што потенцијално помага во намалувањето на сопствениот ризик.

На пример, ако проектот не успее да ги исполни очекувањата, гаранцијата на преостанатата вредност може да значи дека „Енвидија“ ќе обезбеди финансиска поддршка откако ќе бидат преземени чекори за враќање на дел од вредноста, како што се пронаоѓање нови компании што ќе изнајмуваат капацитети или продажба на чиповите на други корисници.

Панично инвестирање

Сепак, ризикот останува, предупредува Алберто Гало, главен инвестициски директор и коосновач на „Андромеда капитал“, зборувајќи генерално за експанзијата на ВИ индустријата и за состојбата на кредитните пазари.

Според Гало, кредитниот пазар сѐ повеќе станува облог на идната побарувачка и вредност на компјутерската моќ во САД. Инвеститорите на тој пазар можеби не добиваат доволно надомест за ризикот што го преземаат, изјави тој во интервју. Неисполнувањето на обврските е реална можност затоа што во жестоката трка за вложување билиони долари во центри за податоци и друга инфраструктура ќе има и победници и губитници.

„Во суштина гледаме панично капитално инвестирање“, рече Гало. „Кој ќе ги плати загубите? Тоа ќе бидат имателите на обврзници, животните осигурителни компании и осигурениците.“

Во моментов, „Енвидија“ останува исклучително профитабилна компанија, што ѝ дава значителен простор да издржи евентуален кредитен притисок. Во фискалната година што заврши на 25 јануари, слободниот паричен тек на компанијата изнесуваше речиси 100 милијарди долари.

Поради тоа, инвеститорите сѐ повеќе заклучуваат дека е помалку веројатно „Енвидија“ да мора да покрива големи загуби, бидејќи значителен дел од ризикот ќе го преземат надворешните финансиски институции.

„Никој не знаеше точно што значи потенцијалното финансирање од 500 милијарди долари“, изјави Сал Наро, главен инвестициски директор на „Кохеренс кредит стратеџис“. „Сега е појасно дека ‘Енвидија’ ги вклучува сите големи играчи и дека нејзината изложеност на ризик не е толку сериозна како што инвеститорите првично стравуваа.“