Во швајцарската банка „Кредит суис“ (Credit Suisse) челниците на компанијата и со последното обраќање не успеаја да ги смират акционерите.
Остануваат сомнежите за финансиската стабилност и идните насоки, па акциите се слизнаа на рекордно ниско ниво.
Акциите на Credit Suisse загубија 12 отсто, со 3,52 швајцарски франци по акција на берзата во Цирих во понеделникот. Годинава, акциите на банката, која се бори со внатрешни превирања и промена на раководството, веќе изгубија 60 отсто од вредноста и се на пат кон најлошата година во историјата.
Новиот извршен директор на банката, Улрих Кернер, упати порака со која се обиде да ги смири вработените и инвеститорите, но не успеа во намерата.
Тој нагласи дека ликвидноста на банката е многу добра, но истовремено призна дека Credit Suisse се приближува до критичен период за иднината на банката.
Преку белешка во текот на викендот тој се обврза дека на вработените ќе им испраќа редовно ажурирање за ситуацијата додека фирмата не го објави новиот стратешки план на 27 октомври.
Кернер беше именуван за извршен директор кон крајот на јули и сега мора да се соочи со пазарните шпекулации, заминувањата на банкарите и сомнежите за капиталот, додека се обидува да постави насоки за во иднина.
Заемодавачот моментно ги финализира плановите кои најверојатно ќе доживеат големи промени и може да вклучат укинување на илјадници работни места во текот на неколку години, објави Bloomberg.
Белешката на Кернер беше втора по ред петочна порака, додека се зголемуваат шпекулациите за иднината на банката.
Аналитичарите во KBW проценуваат дека компанијата можеби ќе треба да собере 4 милијарди швајцарски франци капитал дури и по продажбата на некои средства за да овозможи финансирање на какво било преструктуирање, напори за раст и други непознати.
Пазарната капитализација на Credit Suisse се намали на околу 9,5 милијарди швајцарски франци, што значи дека секоја продажба на акции би била „разводнување“ за долгогодишните сопственици. Неодамна, во март 2021, пазарната вредност беше над 30 милијарди франци.
.webp){kind=icon}
