Кои трговци на струја од државата месечно наплатија 2,8 милиони евра

Министерства, јавни установи, училишта, болници - сите за кои се плаќа од буџетот во септември годинава платиле сметки за струја во висина од 2,8 милиони евра. Лани во истиот период по истиот основ од буџетот биле исплатени два милиони евра помалку.

Блумберг Адриа податоците за исплатите за набавка на електрична енергија ги бараше на порталот Отворени финансии на Министерствто за финансии.

Според податоците објавени таму, во септември годинава, од топ десет фирми со најголеми исплати од буџетот, на трето место е ЕДС, фирма трговец со струја која инкасирала над 1,8 милиони евра. Првите две компании кои за своите услуги добиле пари од буџетот се Народната банка ( каде се префрлуваат пари од задолжувањата) и Македонски железници.

Истиот период лани, во ТОП 10 примтели на пари од државната каса немало ниту една компанија која се занимава со трговија со струја, секако затоа што трошоците за струја не ги надминуваа по висина останатите обврски.

Кои се фирмите кои најмногу продаваат струја на државата?

Минатиот месец рекордер по наплата од буџетот за струја е веќе споменатата компанија ЕДС. Оваа компанија е во сопственост на грчки ППЦ  (Public Power Corporation).  Нејзин основач овде беше поранешниот вицепремиер Кочо Анѓушев во чие време беше донесен новиот Закон за енергетика со кој се либерализираше пазарот на електрична енергија и големите потрошувачи беа префрлени на отворениот пазар. Минатиот септември ЕДС од државата наплатила само 156.000 евра.

Следна на списокот е ЕВН Хоме. Лани во септември австриската компанија била рекордер со наплатени над 626 илјади евра. Но, годинава и оваа компанија драстично ги зголемила примањата од буџетот. Во септември примила повеќе од 960 илјади  евра од буџетот. Во текот на девет месеци од оваа година пак, токму ЕВН дистрибуција е во групата топ 10 приматели од буџетот. Од јануари досега наплатила 7,2 милиони евра.

Лани во септември позначен снабдувач на буџетските институции со струја била бугарската компанија Соларпро. Наплатила близу 89.000 евра. Годинава, фактурирала само за четири дена во септември и инкасирала 18.700 евра.

Минатиот септември за струја од буџетот приход остварила и компанијата Интеренерго од близу 21.000 евра. Годинава оваа компанија не се јавува во листата на Отворени финансии.

Државата од септември почна да штеди

Од први септември на сила се мерките на државата за заштеда на струја. Според планот на Владата, заштедите треба да изнесуваат околу 15 отсто, а мерките ќе важат до крајот на март следната година. Владата даде препораки и за домаќинствата и за приватните фирми, а за државните институции даде обврска за штедење и најави казни за раководителите кои нема да ги почитуваат правилата.

Владата наложи исклучување на декоративното осветлување на фасадите на јавните објекти и културните споменици, гаснење светилки кога има доволно дневна светлина, греење на максимум 20 степени, исклучување на компјутерите по завршување на работните обврски, редовно менување на филтрите на грејните тела и клима уредите, печатење само на неопходните материјали, замена на прозорците со енергетски ефикасни....

За да се намали товарот врз буџетот од скапата струја, опозициската ВМРО ДПМНЕ предлага префрлање на основните и средните училишта на регулираниот пазар, како и за префрлувањето на здравствените установи за снабдување кај ЕСМ продажба. Опозицискиот лидер Мицкоски на вчерашната средба со премиерот Ковачевски побарал и вклучување на јавните комунални претпријатија на регулираниот пазар. По средбата премиерот најави дека предлозите на опозицијата ќе бидат разгледани.

Во моментов нема коментари за веста. Биди прв да коментира...

Остави коментар