.webp){kind=icon}
Главниот извршен директор на „Рајанер“ (Ryanair), Мајкл О'Лири, вели дека способноста на компанијата да стекне поголем пазарен удел во однос на своите конкуренти е загрозена од доцнењето на испораките на авиони од „Боинг“ (Boeing).
И покрај очекуваната економска криза, Ryanair планира деловна експанзија и раст на компанијата. Во вторникот, О'Лири посочи дека е загрижен оти американскиот производител на авиони би можел да испорача само 12 или 13 од нарачаните 21 нов авион што Ryanair треба да ги добие пред Божик, а уште 40 авиони се нарачани до почетокот на летната туристичка сезона кон крајот на мај.
„Единственото прашање околу растот на бизнисот на компанијата во моментот е дали Boeing може да испорача доволно авиони за да можеме да продолжиме да растеме побрзо во рецесија? Неуспехот да ги испорача сите авиони до крајот на јуни ќе доведе до намалување на деловниот капацитет во текот на летото“, посочи извршниот директор на брифингот во Рим.
Ryanair тврди дека економскиот пад ќе биде добар за бизнисот бидејќи Европејците со потесни буџети купуваат авионски билети по најниски достапни цени наместо целосно да се откажат од патувањата. О'Лири планира да го посети производниот погон на Boeing во Сиетл до крајот на месецот за да разговара за доцнењата што производителот на авиони ги поврзува со проблеми со добавувачите и недостиг на работна сила.
Од американскиот производител засега не ги коментираа обвинувањата на Ryanair за одложените испораки.
