‚НЛБ Банка‘ со добивка од 33,2 милиони евра

„НЛБ Банка“ во периодот јануари-септември 2022 година оствари нето добивка во износ од 2.044.453.000 денари (33,2 милиони евра), што претставува зголемување за 21 проценти во однос на остварената нето – добивка во истиот период претходната година.

„Зголемувањето се должи на континуирани продажни активности на кредитните продукти со особен фокус кај домаќинствата, микро, малите и средни претпријатија и зголемен број на корисници на платните сервиси на банката“, информираат од банката.

Заклучно со 30.09.2022 година билансната сума изнесува 106.971.671.000 денари, односно се намали за 737.808.000 денари или за 0,7 проценти во однос на 31.12.2021 година. Паричните средства и паричните еквиваленти изнесуваат 19.018.486.000 денари и бележат намалување од 3,5 проценти во однос на 31.12.2021. Кредитите и побарувањата од банки бележат зголемување од 386.913.000 денари во однос на 31.12.2021.

„Вкупните кредити кај небанкарскиот сектор изнесуваат 68.062.742.000 денари и бележат зголемување од 3,8 проценти во однос на 31.12.2021. Кредитирањето во секторот домаќинства е зголемено за 7 проценти во текот на 2022 година што се должи на порастот кај потрошувачките и станбените кредити, додека кредитирањето на нефинансиски правни лица е намалено за 2,6 проценти. Вложувања во хартии од вредност изнесуваат  15.364.622.000 денари и се намалени за 16,2 проценти во однос на 31.12.2021 поради доспевање на домашни и странски државни записи и обврзници“, соопшти банката. 

Преземените средства врз основа на ненаплатени побарувања во однос на 31.12.2021 година се зголемени за 20,1 проценти. Вкупните депозити (депозити на комитенти и депозити на банки) изнесуваат 85.551.048.000 денари и во однос на 31.12.2021 година се намалени за 1.038.120.000 денари или за 1,2 проценти. 

„Надолната промена се должи на намалување на тековните сметки во корпоративниот сектор, додека кај домаќинствата во текот на 2022 година е забележан раст на тековните сметки и депозитите по видување при пад на орочените депозити“, објаснуваат од банката. 

Нето каматните приходи, заклучно со 30.09.2022 година се повисоки за 4,7 проценти споредено со претходната година, при што приходите од камати се повисоки за 3,1 проценти, главно поради повисоки каматни приходи од секторите нефинансиски правни лица и домаќинства додека расходите за камати се пониски за 10,7 проценти главно поради пониски каматни стапки и преструктурирање на изворите во корист на депозити по видување и тековни сметки при пораст на каматните расходи по основ на субординирани обврски. Нето приходите од провизии се повисоки за 4,5 проценти споредено со претходната година, при што приходите од провизии се зголемени за 11,5 проценти како резултат на зголемени приходи од реализирани трансакии на ПОС терминали и картично порамнување, повисоки приходи од услуги во платен промет во земјата и странство и повисоки приходи од водење трансакциски сметки.

Расходите за провизии се зголемени за 21,1 проценти, главно поради повисоки расходи од картично работење кон меѓународните картични системи, а во помала мера поради зголемување на расходите од кеш центарот и услугите во платен промет со странство. Останатите некаматни приходи изнесуваат 547.349.000 денари и се намалени во однос на претходната година, главно поради пониски наплати на претходно отпишани побарувања кај нефинансиски правни лица. Вкупните приходи од работење изнесуваат 3.797.029.000 денари и се пониски за 3,4 проценти во однос на претходната година. Вкупните оперативни трошоци изнесуваат 1.695.543.000 денари и се зголемени за 9 проценти.

„Во претстојниот период се очекува да се одржи макроекономската стабилност на државата, при неизвесен деловен амбиент за реалниот сектор поврзан со последиците од глобалната криза, нарушувањата на каналите на снабдување, пазарите на енергија и инфлаторните притисоци. „НЛБ Банка“ АД Скопје и понатаму делува во насока на поддршка на приватниот сектор во земјата со што има значаен придонес во макроекономскиот и финансискиот амбиент на државата. Така и понатаму во фокусот на работењето на „НЛБ Банка“ АД Скопје ќе бидат дигитализацијата и зголемувањето на дигиталната пенетрација на клиентите преку унапредување на капацитетите на дигиталните канали со што ќе се обезбеди повисоко ниво на достапност на Банката и подобро искуство на клиентите како и поддршка на клиентите преку зајакнување на улогата на контакт-центарот. Дополнителен фокус е ставен и на проширување на палетата на производи и услуги преку продажбата на различни банкарски производи и зголемување на квалитетот на услугите со што се очекуваат уште подобри резултати во клучните сегменти од работењето на Банката“, велат од банката.

Во моментов нема коментари за веста. Биди прв да коментира...

Остави коментар