.webp){kind=icon}
Раст на добивката од 15 отсто на годишно ниво остварила во деветте месеци годинава најголемата домашна фармацевтска компанија „Алкалоид“. Во истиот период приходите од продажба се зголемиле за 16 отсто , додека од јануари до септември реализирани се нови 161 вработување. Според кварталниот финансиски извештај Алкалоид има добивка во овој период од 1.140.263.568 денари (18,54 милиони евра).
Вкупните консолидирани продажби, пак, достигнуваат 10.988.914.294 денари (речиси 179 милиони евра). Во извештајот стои дека консолидираните продажби остварени на домашниот пазар се зголемени за 3 отсто, а вкупниот консолидиран извоз на компанијата е зголемен за 23 проценти.
Од вкупните консолидирани продажби 31 отсто се остварени на домашниот пазар, додека, пак, 69 проценти се остварени на странските пазари. Гледано според региони, во земјите од Југоисточна Европа се остварени 30 отсто, во земјите од Западна Европа (ЕУ и ЕФТА) 21 процент, во земјите од Источна Европа (ЗНД, УКР, ...) се остварени 16 отсто, а на другите пазари два проценти од вкупните консолидирани продажби.
Најголем пораст кај извозните пазари бележат продажбите остварени во Турција (раст од 169 отсто), Полска (раст од 161 отсто), Романија (раст од 138 отсто), САД (раст од 71 процент), Грција (раст од 44 отсто), Бугарија (раст од 41 отсто), Германија (раст од 38 отсто), Ерменија (раст од 37 отсто), Косово (раст од 14 отсто), Црна Гора (раст од 11 отсто) итн. Во периодот јануари – септември 2022 година во сегментот фармација се реализираа и првите поголеми продажби во Португалија, во износ од 12,5 милиони денари и во Монголија, во износ од 12,8 милиони денари.
Гледано според групи производи, во структурата на вкупните консолидирани продажби најголемо учество заземаат производите од сегментот фармација, и тоа 88 отсто.
Вкупните инвестиции во основни средства во периодот јануари – септември 2022 година изнесуваат 841.996.474 денари.
Од компанијата известија дека со одлука на Управниот одбор на Алкалоид АД Скопје, во март 2022 година е одобрен и исплатен регрес за користење годишен одмор за вработените во компанијата во висина од нето износ од 30.000 денари. Групацијата брои 2.617 вработени, од кои 2.015 се во базата во Скопје, а 602 се вработени во подружниците во странство.
Инаку цената на акцијата на компанијата во периодот јануари – септември 2022 година се движеше од 15.598 денари до 19.400 денари, или просечно 17.531 денари за една акција, што претставува раст од 14,8 отсто во споредба со просечната цена во истиот период од 2021 година. На 30 септември акциите во оваа фирма се во сопственост на 5.309 акционери, физички и правни лица, a пазарната капитализација на компанијата изнесуваше 23 милијарди денари.
Во образложението кон финансискиот резултат кој денеска е објавен на берзата, од Алкалоид објавија и дел од бизнис-планот за годинава. Согласно проекциите од претходнат година во 2022 година треба да се инвестираат околу 14 отсто од консолидираните приходи од продажбите во материјални и во нематеријални средства, да има раст од 8 отсто на консолидираните продажби во однос на 2021 година, како и раст од 7 отсто на консолидираниот профит пред оданочување во однос на 2021 година.
Од компанијата велат и дека во услови на економска криза презеле голем број мерки.
„Она што како тренд започна во 2021 година и доминира и во 2022 година е забележителниот раст на цените на голем дел од влезните суровини и материјали, енергенсите, како и порастот на цените на транспортот на глобално ниво, а особено и значителните пролонгирања на роковите за испорака. Сето ова влијае и на стапката на инфлацијата што веројатно како тренд ќе биде уште понагласен во периодот што следи. Земајќи го предвид конфликтот помеѓу Русија и Украина, започнувајќи од 24 февруари 2022 година, Алкалоид АД Скопје презема неопходни мерки за заштита на инвеститорите, купувачите и вработените обидувајќи се да им овозможи безбедни услови, стои во образложението.
