Маск побарал менаџерите да состават список за отпуштања во 'Твитер'

Илон Маск почна да го подготвува теренот за една рунда на отпуштања во компанијата „Твитер“ (Twitter), само неколку дена откако ја презеде сопственоста на социјалната мрежа.

Милијардерот, кој ја заврши својата аквизиција од 44 милијарди долари во четвртокот, побарал од менаџерите да подготват списоци на членови на тимот кои би можеле да бидат отпуштени, според извор на Bloomberg.

Намалувањето на бројот на вработени би можело да започне уште во текот на викендот, објави претходно „Њујорк Тајмс“ (New York Times). Претставник на Twitter со седиште во Сан Франциско во саботата не одговорил веднаш на барањето за коментар.

Загриженост за масовни отпуштања се појави во пресерет на трансакцијата за преземање на компанијата, кога на потенцијалните инвеститори им беше кажано дека Маск ќе елиминира 75 отсто од работната сила, која во моментот е близу 7.500 вработени. Маск подоцна негираше дека намалувањата ќе бидат толку длабоки, иако не ги елаборираше плановите за отпуштања.

Намалувањето може да биде поблиску до 50 отсто од работната сила, објави во саботата „Вашингтон пост“ (Washington Post). Меѓу првите сектори кои би биле засегнати веројатно е оној за легислатива, доверба и безбедност, оддел која го надгледува модерирањето на содржината, пишува весникот.

Маск веќе отпушти голем дел од раководството на Twitter, вклучувајќи го главниот извршен директор, главниот финансиски директор и двајца високи правни службеници. Тој планира самиот да биде извршен директор во блиска иднина, според луѓе запознаени со ова прашање.

Во последниве недели, Маск ги навести своите кадровски приоритети, велејќи дека сака да се фокусира на основниот производ. „Ќе владеат софтверското инженерство, работата на серверите и дизајнот“, напиша тој на Twitter на почетокот на октомври. Некои вработени се поканети на состанок на персоналот в среда, а некои не, тврдат извори запознаени со ситуацијата. Ова предизвикало сомнеж за тоа кои тимови ќе бидат отстранети.