Маск ќе отпушти половина од вработените во Твитер

Илон Маск планира да укине околу 3.700 работни места во „Твитер“ (Twitter Inc.), или половина од работната сила на компанијата за социјални мрежи, во обид да ги намали трошоците по неговата аквизиција од 44 милијарди долари, тврдат упатени извори. 

„Новиот сопственик на ’Твитер’ има цел да ги информира засегнатите вработени в петок“, посочуваат изворите, кои побарале да останат анонимни, бидејќи станува збор за интерни планови. „Маск, исто така, има намера да ја смени тековната политика на компанијата за работа од секаде и ќе бара од преостанатите вработени да се појават во канцелариите - иако ќе може да се направат одредени исклучоци“, информираат упатените лица.

Маск со тим од советници разгледува низа сценарија за кратење на работните места и други промени во политиката на „Твитер“ со седиште во Сан Франциско, велат изворите, додавајќи дека условите за намалување на бројот на вработени сè уште може да се променат. Во едно сценарио што се разгледува, како што нагласуваат две лица запознаени со состојбите, на отпуштените работници ќе им биде понудена испратнина за 60 дена.

Во меѓувреме, според изворите, компанијата ја напуштил главниот сметководител Роберт Кајден, со што станал еден од последните високи раководители од пред ерата на Маск што заминал.

Портпаролот на „Твитер“ не одговори веднаш на барањето за коментар.

Маск е под притисок да најде начини да ги намали трошоците на бизнисот, за кој вели дека го платил прескапо. Милијардерот се согласи да плати 54,20 долари по акција во април, токму кога пазарите паднаа. Потоа со месеци се обидуваше да излезе од трансакцијата, тврдејќи дека компанијата го довела во заблуда за распространетоста на лажни налози на мрежата. „Твитер“ тужеше за да го принуди Маск да го исполни својот договор, а во последните недели Маск попушти. Договорот за преземање беше затворен минатиот четврток.

Bloomberg

Вработените во „Твитер“ се подготвуваат за отпуштања уште откако Маск ја презеде функцијата и веднаш собори голем дел од највисокиот извршен тим, вклучувајќи ги и главниот извршен директор Параг Агравал, финансискиот шеф Нед Сегал и високите правни службеници Вијаја Гаде и Шон Еџет. Во деновите што следуваа, заминаа главниот маркетинг-директор Лесли Берланд, главниот директор за клиенти Сара Персонет и Жан-Филип Махеу, кој беше потпретседател за глобални решенија за клиенти.

Маск се назначи себеси за Chief Twit во својата биографија на социјалната мрежа. „Блумберг“ претходно објави дека тој самиот ќе ја преземе улогата на привремен извршен директор. Маск, исто така, го распушти одборот на компанијата и стана единствен директор, велејќи подоцна дека тоа е „само привремено“.

Во текот на викендот биле отпуштени неколку вработени со директорски и потпретседателски работни места, тврдат извори запознаени со ова прашање. Според изворите, од другите менаџери било побарано да направат списоци на вработени во нивните тимови што би можеле да бидат отпуштени.

Од високиот менаџмент во продукт-тимовите било побарано да се насочат кон намалување на бројот на вработени за 50 отсто, изјави упатен извор во текот на неделава.