Телекомуникациската компанија „Т-мобајл“ (T-Mobile) во САД размислува за купување на „Минт мобајл“ (Mint Mobile), евтин давател на безжични услуги поддржан од актерот Рајан Рејнолдс, велат извори запознаени со ситуацијата. Вториот по големина американски мобилен оператор е во преговори со „Минт мобајл“, тврдат изворите, кои побарале да останат анонимни бидејќи процесот е во тек и предметот не е јавен. Тие наведуваат дека не е донесена конечна одлука и „Минт мобајл“ може да одлучи да остане независен или да биде продаден на друга компанија.
Добро упатени извори велат дека актерот Рејнолдс поседува четвртина од компанијата, а претставници на „Т-мобајл“ одбија да коментираат, како и претставниците на „Минт мобајл“.
„Минт мобајл“ нуди поволни тарифи за мобилни телефони на мрежата на „Т-мобајл“, со пакети што почнуваат од 15 долари месечно, според ценовникот на неговата веб-страница. Плановите на компанијата се дизајнирани со цел луѓето да не плаќаат повеќе отколку што им е потребно и се овозможува промена на договорите во период од три месеци.
Рејнолдс, ѕвездата на филмската франшиза „Дедпул“ (Deadpool), стана косопственик на „Минт мобајл“ во 2019 година. Како главно лице за маркетинг или т.н. pitchman на компанијата, глумеше во ТВ-рекламите на операторот и му даде силен поттик преку своите 21 милион следбеници на Твитер и 47 милиони следбеници на Инстаграм.
.webp){kind=icon}