.webp){kind=icon}
Стотина програмери од технолошкиот центар на Deutsche Bank во Русија се селат во Берлин. Од најголемата германска банка велат дека ваквата одлука нема да влијае на работата.
Банката во технолошкиот центар во Русија има околу 1.500 вработени, во Санкт Петерсбург и Москва и на сите им понудила работа во Германија, пишува германскиот весник Handelsblatt, повикувајќи се на извори од банката. Од нив стотина решиле да ја прифатат понудата.
Од Deutsche Bank кон средината на март соопштија дека оперативните ризици од затворање на центарот во Русија се „многу ограничени“.
„Во прашање е само еден од неколкуте технолошки центри низ светот. Неговото затворање не е никаков посебен ризик за глобалното делување“, соопшти тогаш банката која слични центри има во Букурешт, САД и Индија.
Сепак, во извештајот за првиот квартал од годината, банката која котира на германскиот берзански индекс Dax, беше повнимателна.
„Постои ризик дека нашите можности за користење на тие технолошки ресурси ќе се намалат или ќе исчезнат, на пример заради западните санкции, државните мерки во Русија или заради мерките на менаџментот“, наведе банката.
Со преселување на вработените, Deutsche Bank го намалува ризикот да остане без стручни работници ако заради напнатоста меѓу Западот и Русија се случи да не може да управува со центарот во Русија, оценува Handelsblatt.
