text size
Клубовите за чести патници на азиските авиокомпании, вклучувајќи ги и „Кетеј Пацифик“ (Cathay Pacific Airways Ltd) и „Сингапур ерлајнс“ (Singapore Airlines Ltd), дополнително паднаа зад американските ривали за време на пандемијата, нагласувајќи ја штетата низ регионот од продолжените ограничувања за патување.
Предводени од „Делта ерлајнс“ (Delta Air Lines Inc), секторите за лојалност во четирите главни американски авиокомпании ги зацврстија своите позиции во почетокот на 2023 година како највредни програми за бодови во светот, објави консултантската компанија „Он поинт лојалти“ (On Point Loyalty) во својот извештај. Освен понудата на „Саутвест ерлајнс“ (Southwest Airlines Co), програмите за лојалност вредат повеќе од берзанските процени на секој од американските превозници, покажуваат процените во извештајот.
Одделите за лојалност опстануваат речиси сами, како центри за генерирање приходи за авиокомпаниите, откако пандемијата ги приземји флотите низ светот во почетокот на 2020 година. Вредноста на единиците се појави откако авиопревозниците се соочија со стрес, вклучувајќи ги „Делта“ и „Јунајтед ерлајнс“ (United Airlines Holdings Inc), кои ги поставија своите програми за поени како осигурување против големи заеми и обврзници, вредни милијарди долари, за да ја пребродат ковид-кризата.
Bloomberg Mercury
Авиокомпаниите традиционално откриваат неколку финансиски детали за своите програми за лојалност, вклучувајќи го и својот примарен извор на приход, кој е продавање милји на банките, кои потоа ги користат за наградување за користењето на кредитните картички на клиентите.
Единствените европски компании што се доволно големи за да се рангираат во првите десет беа групите што опфаќаат неколку авиокомпании во различни земји, како што е матичната ИАГ (IAG SA) на „Бритиш ервејс“ (British Airways).
Азиските авиокомпании генерално поминаа полошо во извештајот наспроти оние од другите континенти. Кина, која пред пандемијата беше најголемиот пазар за патувања во светот, повторно ја отвори својата меѓународна граница дури минатиот месец по долгогодишното затворање.
.webp){kind=icon}
