text size
Најголемата фармацевтска компанија во земјава „Алкалоид“ ја заврши 2022 година со добивка од 23,8 милиони евра, што е за 12 проценти повеќе од претходната година. Компанијата го објави финансискиот резултат од работењето денеска, а според него компанијата има раст во сите сегменти од работењето. Единечната нето-добивка се зголемила за 10 отсто на годишно ниво.
Во 2022 година „Алкалоид“ има вкупни приходи од работењето од 250 милиони евра, што е за 16 отсто повеќе во споредба со истиот период во 2021 година. Во структурата на вкупните приходи најголемо учество, или 93 отсто, имаат приходите остварени со продажба на производи и на услуги, кои пораснале за 12 проценти.
Од вкупните консолидирани продажби, 68 проценти се остварени на странските пазари. Најголем пораст кај извозните пазари бележат продажбите остварени во земјите од Источна Европа (раст од 38 отсто) и во земјите од Западна Европа (раст од 17 проценти).
Ако се анализира расходната страна, растот е позначаен или остварените консолидирани вкупни расходи во периодот јануари-декември 2022 година изнесуваат приближно 223 милиони евра, што е за 17 проценти повеќе од 2021 година.
Вкупните инвестиции во основни средства во периодот јануари-септември 2022 година изнесуваат речиси 24 милиони евра и се за 24 проценти поголеми од инвестициите во 2021 година.
Во периодот јануари-декември 2022 година во „Алкалоид“ се реализирани 187 нови вработувања во Македонија.
Во бизнис-планот за 2023 година е наведено дека е предвидено инвестирање на околу 11 отсто од консолидираните приходи од продажби во материјални и во нематеријални средства, раст од 10 отсто на консолидираните продажби во однос на 2022 година, како и раст од 7 проценти на консолидираниот профит пред оданочување во однос на 2022 година.
.webp){kind=icon}
