„Стелантис“ (Stellantis NV) планира оваа година да укине дури 2.000 работни места во Италија и со тоа дополнително да ја намали својата работна сила во поранешната матична земја на „Фиат“ (Fiat), бидејќи транзицијата кон електрични возила го зема својот данок.
Француско-италијанскиот производител на автомобили, формиран од спојувањето на „Фиат крајслер“ (Fiat Chrysler) и „ПСА груп“ (PSA Group) во 2021 година, заедно со локалните синдикати се договорија за намалувањата што претставуваат околу 4,3 проценти од вкупната работна сила во земјата, која изнесува 47.000 работници. Одлуката следи по слични кратења направени минатата година.
Планираните откази ќе се однесуваат главно на работници кои не се директно вклучени во производството. Тие за возврат ќе добијат бенефиции кои вклучуваат предвремено пензионирање и дури две години плата за постарите работници, се вели во соопштението на синдикатите објавено денеска.
„Трошоците за електрификација ќе имаат влијание врз деловното влијание што ќе го имаме ширум светот“, рече главниот извршен директор Карлос Таварес. На прашањето за потенцијалните натамошни кратења на работните места во интервју за телевизијата „Блумберг“, тој рече дека ништо не е надвор од игра.
Производителите на автомобили се соочуваат со инфлација и нарушување на синџирот на снабдување во услови кога ги преуредуваат своите фабрики за да преминат кон автомобили на електричен погон. Претходно, во текот на овој месец, „Форд“ (Ford Motor Co) соопшти дека ќе укине 3.800 позиции, главно во Германија и Велика Британија, за да заштеди, но и затоа што за производство на електрични возила се потребни помалку работници.
.webp){kind=icon}
