text size
„Амазон“ (Amazon.com Inc) затвора осум локации што се со автоматска наплата (без касиери) на „Амазон гоу“ (Amazon Go) во Сиетл, Њујорк и Сан Франциско, што го означува најновиот круг на намалување на трошоците на гигантот за е-трговија во услови на забавување на растот на продажбата. Засегнатите продавници ќе останат отворени до 1 април, соопшти компанијата.
„Како и секој физички трговец на мало, ние периодично го проценуваме нашето портфолио на продавници и донесуваме одлуки за оптимизација на работата. Остануваме посветени на форматот на 'Амазон гоу', работиме со повеќе од 20 такви продавници низ САД и ќе продолжиме да учиме кои локации и карактеристики најмногу одекнуваат кај клиентите“, наведе портпаролката на „Амазон“, Џесика Мартин, во изјава испратена по електронска пошта.
Компанијата ја претстави својата прва продавница без касиери во близината на седиштето во Сиетл во 2016 година, нудејќи салати, сендвичи и грицки за зафатените канцелариски работници што бараат опција за оброци буквално во трчање. Форматот беше жртва на пандемијата, бидејќи многу луѓе работеа од дома, иако одеа во канцеларија само неколку дена во неделата.
„Амазон“ го направи својот најголем чекор во физичката трговија на мало во 2017 година, со купувањето на маркетите „Хол фудс“ (Whole Foods Market), во вредност од 13 милијарди долари, кои имаат повеќе од 500 локации. Оттогаш компанијата лансира сопствен синџир на супермаркети „Амазон фреш“ (Amazon Fresh), тврдејќи дека ѝ е потребен сопствен посебен формат за да ја зголеми продажбата на намирници.
Напорите на „Амазон“ да ја прекине физичката малопродажба беа опкружени со предизвици. Покрај последниот потег за затворање на осум локации на „Амазон гоу“, компанијата затвори книжарници и продавници за весници и списанија низ целата земја. Компанијата неодамна го стави во мирување и проширувањето на продавниците на „Фреш“, бидејќи прави анализи како да се истакне синџирот кај купувачите.
Откако почна да истекува бумот од ерата на пандемијата, компанијата ги намалува трошоците. „Амазон“ минатата година ги замрзна повеќето корпоративни вработувања и започна круг на отпуштања, што на крајот ќе изнесува околу 18.000 работници. „Блумберг“ вчера објави дека компанијата ја паузира изградбата на своето второ големо седиште во близината на Вашингтон.
Интернет-страницата за вести од технолошката индустрија „Гиквајр“ (Geekwire) уште претходно објави за затворањето на „Амазон гоу“.
.webp){kind=icon}
