text size
Производителот на електрични возила „Тесла“ (Tesla) ги намали цените на своите седани „модел С“ (Model S) и теренците „модел Х“ (Model X) во САД, доцна во неделата, за пет односно десет илјади долари, затоа што компанијата се обидува да ја зголеми побарувачката во последниот месец од првиот квартал годинава.
Така, цената на „модел С“ моментално изнесува 89.990 американски долари, што е пад од 5,2 проценти во однос на претходните 94.990 американски долари, се наведува на веб-страницата на компанијата. „Модел С плејд“ (Model S Plaid) сега чини 109.990 долари, што е пад од 4,3 проценти во однос на претходната цена од 114.990 долари.
Цената на „модел Х“ во моментов е 99.990 долари, што е намалување за 9,1 отсто во однос на претходните 109.990 долари. „Модел Х плејд“ (Model X Plaid), кој претходно чинеше 119.990 долари, сега може да се набави за 109.990, односно со намалување од 8,3 отсто.
Bloomberg Mercury
„Тесла“ им ги продава своите автомобили директно на потрошувачите и во деловната политика честопати ги менува цените. Најновите потези следуваат откако производителот драстично ги намали цените во јануари, кога ја започна кампањата за зголемување на продажбата на своите автомобили.
На Денот на инвеститорите, кој се одржа минатата недела во фабриката на „Тесла“ во Остин, Тексас, извршниот директор Илон Маск и другите шефови во „Тесла“ ги истакнаа ефективноста на производство и намалувањето на трошоците. „Желбата кај луѓето да поседуваат 'тесла' е исклучително голема. Ограничувачки фактор е нивната способност да платат за 'тесла'“, рече Маск.
.webp){kind=icon}
