„Нестле“ (Nestle SA), најголемата светска групација за храна, е меѓу последните понудувачи што се натпреваруваат за купување на индиската „Капитал фудс“ (Capital Foods Pvt), бидејќи се обидува да го зајакне своето присуство во брзорастечката економија, велат лица запознаени со ова прашање.
Швајцарската компанија разговараше за условите за потенцијален договор за „Капитал фудс“, чие седиште е во Мумбај, велат изворите, кои побарале да не бидат идентификувани бидејќи информациите се приватни. „Која било трансакција најверојатно би ја вреднувала индиската компанија на повеќе од една милијарда долари“, сметаат изворите.
„Капитал фудс“ го прави брендот „Чингс сикрет“ (Ching’s Secret) за зачинети нудли, а продава и различни смеси за готвење.
„Иако разговорите за потенцијален договор напредуваат, сепак и неколку други преговарачи исто така изразија интерес за купување на ’Капитал фудс’ и нема гаранција дека ’Нестле’ ќе излезе како победник“, велат изворите што нè информираат за случувањата.
Акциите на индиската единица на „Нестле“, која котира на берзата, пораснаа за 10 проценти во тргувањето во Мумбај во последните 12 месеци, што ѝ дава пазарна вредност од околу 22,3 милијарди долари. Фирмата го отвори својот прв производствен капацитет во Индија во 1961 година и продава сè, од јогурт до житарки.
Меѓу инвеститорите во „Капитал фудс“ е и „Џенерал Атлантик“ (General Atlantic), кој купи удел во компанијата во 2018 година. Портпаролот на „Нестле Индија“ одби да коментира, додека претставниците на „Капитал фудс“ не одговорија на барањата за коментар.
.webp){kind=icon}
Во моментов нема коментари за веста. Биди прв да коментира...