Италијанскиот државен превозник „ИТА ервејс“ (ITA Airways) го одобри бизнис-планот споделен со „Дојче Луфтханза“ (Deutsche Lufthansa AG), што претставува дополнителен чекор кон продажба на малцински удел на германската авиокомпанија.
Планот предвидува развој на флотата, мрежата и стратегиските цели на „ИТА ервејс“, а за него разговараа италијанскиот министер за финансии Џанкарло Џорџети, претседателот на ИТА, Антонино Туричи, и главниот извршен директор на „Луфтханза“, Карстен Спор, на состанокот што се одржа денеска во Рим. Планот сè уште не е јавно обелоденет.
„Постигнат е дополнителен напредок во насока на индустриско партнерство меѓу двата авиопревозника“, се вели во соопштението од тамошното министерство за финансии.
„Луфтханза“ има цел да купи малцински удел во авиокомпанијата, која е наследник на пропаднатиот италијански авиопревозник „Алиталија“, зајакнувајќи ја на тој начин својата позиција на европскиот пазар на авиокомпании. Германскиот авиопревозник бара да купи дури 40 отсто од ИТА, а двете страни сè уште преговараат за вредноста.
Дневниот весник „Кориере дела сера“ (Corriere della Sera) објави дека уделот би можел да вреди меѓу 200 и 250 милиони евра. Инаку, „ИТА ервејс“ ја заврши 2022 година со загуба од 486 милиони евра, се вели во соопштението.
.webp){kind=icon}