.webp){kind=icon}
Компанијата „Боинг“ (Boeing) планира да го зголеми производството на својата фамилија на авиони „737“ на месечна стапка од 38 авиони до средината на годината, неколку месеци порано отколку што предвидуваа аналитичарите, велат извори запознаени со ова прашање.
Американскиот производител на авиони ги информирал клиентите за своите планови да го зголеми производството на авионите со најголема заработка во следните неколку месеци, а истовремено ангажира и обучува работници за поддршка на забрзаното темпо на производството, посочуваат лицата, кои побарале да не бидат идентификувани бидејќи станува збор за прашања од доверлива природа.
Забрзувањето на производството и испораката на авионите од типот „737 макс“ може да му овозможи на „Боинг“ да ја достигне целта од 10 милијарди долари годишен слободен готовински тек до 2025 или 2026 година, без да му го предаде пазарниот удел на конкурентниот „Ербас“ (Airbus). По обраќањето во Њујорк на 30 март, комерцијалниот шеф на „Боинг“, Стен Дил, им рече на новинарите дека зголемувањето на стапката на производство е во тек и треба да се случи „многу наскоро“.
Акциите го променија падот во четвртокот, по веста за зголемувањето на производството, покачувајќи се за 0,5 отсто, до 211,07 долари, во 14.51 часот во Њујорк. Акциите годинава порасна за 10 отсто до крајот на трговската сесија во средата.
Bloomberg
„Боинг“ во текот на изминатата година работеше за да создаде постојан проток на авиони од својата фабрика во Рентон, Вашингтон, со брзина од 31 авион месечно. Тоа не беше лесно. Производителот се бореше со недостиг од мотори и од опрема во кабината и работеше на засилување на обуките за нови вработувања по долгогодишното нарушување предизвикано од пандемијата на ковид-19 и приземјувањето на авионите „737 макс“ низ светот.
Производителот на авиони со седиште во Арлингтон, Вирџинија се очекува следната недела да пријави пораст на испораките во првиот квартал, кога ќе ги објави испораките за март, што е знак за напредок на „Боинг“ кон стабилизирање на операциите во своите фабрики. Производителот испорача околу 53 авиони „макс“ минатиот месец и вкупно 130 авиони во првиот квартал, според аналитичарот на „Џеферис“ (Jefferies LLC), Шеила Кахјаоглу.
Bloomberg
Зголемувањето на производството зависи од доставувачите на компанијата и нивната способност да продолжат да напредуваат кон отстранување на проблемите во нивните фабрики, така што распоредот може да биде нарушен, вели едно од упатените лица.
Директорите на „Спирит аеросистемс“ (Spirit AeroSystems Holdings Inc.), компанија што произведува алуминиумски рамки за авиони, во февруари изјавија дека планираат да го зголемат производството на делови за „737“ на стапка од 38 месечно до август и на стапка од 42 месечно до октомври, според распоредот договорен со „Боинг“.
„Другите доставувачи следат различни распореди, врз основа на списоци што веќе се доставени до ’Боинг’“, рече Клиф Колиер, директор во „Чарлс Едвардс“ (Charles Edwards Management Consulting). Напредокот исто така може да биде закочен поради постојниот притисок врз производителите во воздухопловството.
