.webp){kind=icon}
„Хуавеј“ (Huawei Technologies Co.) сака да го направи Ријад свое седиште за Блискиот Исток поради настојувањата на владата на Саудиска Арабија да се позиционира како регионален деловен центар и да ги зголеми дипломатските и деловни врски со Кина, велат познавачите на ова прашање.
Кинеската компанија, која веќе има канцеларии во главниот град на Саудиска Арабија, како и во други градови низ Блискиот Исток, е во преговори со властите во Ријад за да го зајакне своето присуство во земјата, рекоа изворите, барајќи да не бидат идентификувани бидејќи информациите се приватни.
Конечната одлука сè уште не е донесена од страна на „Хуавеј“, велат изворите. Портпаролот на компанијата одби да коментира. „Хуавеј“ моментално има седиште за регионот во Дубаи и Бахреин.
Саудиска Арабија објави дека од почетокот на 2024 година на владините субјекти ќе им биде забрането да работат со странски фирми што немаат регионални претставништва во земјата, бидејќи се обидува да го ограничат изливот од нивната економија и да привлече странски инвестиции.
„Хуавеј“ го зајакнува своето присуство во Саудиска Арабија, иако САД ги притискаат сојузниците да ги избегнуваат кинеските технолошки компании. Владини претставници изјавија дека на крајот на минатата година околу 80 компании поднеле барање за лиценци за преместување на своите централи во Ријад.
Врските меѓу Саудиска Арабија и Кина растат. По посетата на кинескиот претседател Си Џинпинг на Ријад минатата година, двете земји потпишаа договори во вкупна вредност од 50 милијарди долари.
