.webp){kind=icon}
„Ворнер Брос Дискавери“ (Warner Bros. Discovery Inc.) ќе ја преименува својата стриминг услуга во „Макс“ (Max), односно го исфрла „Ејч-би-о“ (HBO) од брендот и ја зајакнува својата програмска линија во обид да привлече повеќе претплатници.
Компанијата го откри името на прес-конференција во Бурбенк, Калифорнија, во средата, каде што главниот извршен директор Дејвид Заслав и неговиот тим објавија детали, вклучително и нова серија за Хари Потер и нови содржини од „Ди-си комикс“ (DC Comics). Цените ќе се движат од 16 до 20 долари месечно без рекламирање и 10 долари месечно со реклами, што главно е во согласност со тековната услуга.
„Можеме да се натпреваруваме со најголемите играчи во сферата“, рече Џеј Би Перет, шеф на стриминг бизнисот на компанијата.
Заслав минатата година ја спои својата поранешна компанија, реалити дифузерот „Дискавери Комуникејшнс“ (Discovery Communications), со матичната компанија на познатите студија „Ворнер Брос“. Целта беше поголема конкурентост со платформите на „Нетфликс“ (Netflix) и „Волт Дизни“ (Walt Disney Co.). Тие имаат над двојно повеќе стриминг корисници од „Ворнер Брос“, кој имаше 96 милиони претплатници на крајот на 2022 година.
И покрај тоа што „Ејч-би-о“ останува златен стандард за производство на серии со блескави рецензии, Заслав верува дека дел од земјата не плаќа за услугата бидејќи истата се поврзува со високи цени и крајбрежните елити. „Ејч-би-о“ освои повеќе Еми награди од која било мрежа минатата година и веќе има две хит шоуа годинава со „Последниот од нас“ (The Last of Us) и финалната сезона на „Следоред“ (Succession).
Новото име на брендот и додавањето на обемна колекција на реалити програми, како „Голи и ислашени“ (Naked and Afraid) од „Дискавери“ каналот на „Ворнер Брос“, би можеле да привлечат гледачи кои моментално не плаќаат за „Ејч-би-о“. Исто така, може да ги задржи корисниците подолго време на апликацијата, што им се допаѓа на огласувачите.
Извор: Warner Bros. Discovery Inc.
Според истражувачката фирма „Нилсен“ (Nielsen), „Ејч-би-о макс“ има помалку од 1,5 отсто од телевизиската гледаност во САД, привлекувајќи исто колку „Пикок“ (Peacock) и „Тјуби“ (Tubi), два ривалски сервиса. „Нетфликс“ привлекува над пет пати повеќе публика секој месец, додека „Хулу“ (Hulu) и „Амазон Прајм“ (Amazon Prime Video) привлекуваат двојно повеќе.
Перет за ова делумно ја обвини технологијата на апликацијата „Ејч-би-о макс“, која се потпира на тоа луѓето да ги даваат повеќето препораки и не ја базира услугата кон афинитетите на корисниците. Околу 75 отсто од гледачите избираат што да гледаат од почетната страница.
„Има многу работи кои машините можат да ги направат многу поефикасно“, објасни тој.
Како дел од најавата, „Ворнер Брос“ соопшти дека „Макс“ ќе дебитира во САД на 23 мај, а подоцна оваа година и во Латинска Америка. Одбрани земји во Европа и Азија ќе се приклучат на платформата следната година. Слоганот на услугата ќе биде „Она што треба да се гледа“ (The One to Watch). Постојните клиенти на „Ејч-би-о Макс“ ќе продолжат да ја добиваат услугата. Некои ќе треба да преземат нова апликација за проширениот каталог.
