.webp){kind=icon}
Американскиот малопродажен синџир на апарати за домаќинство и мебел „Бед, бат енд бијонд“ (Bed Bath & Beyond) поднесе барање за стечај во Њу Џерси.
Според стечајните документи, проценетите средства на компанијата се од една до десет милијарди долари, а во истиот опсег се и долговите. Проценетиот број на доверители се движи меѓу 25.001 и 50.000.
Во јануари од компанијата објавија дека постои „суштински сомнеж“ дека нема да можат да продолжат со работа и дека ги разгледуваат опциите за реструктурирање на долгот.
Компанијата ја доби последната сламка за спас од хеџ-фондот „Хадсон беј“ (Hudson Bay Capital Management) - зделка што би донела милијарда долари за „Бед, бат енд бијонд“ под одредени услови. Сепак, не бил исполнет условот за минимална цена на акцијата, па договорот бил раскинат. Компанијата потоа објави дека ќе продаде повеќе акции во обид да избегне банкрот.
Непотребен пад
Стечајот на „Бед, бат енд бијонд“ не е, како што тврдат некои експерти, пример за неизбежен колапс на традиционалните продавници, кои се борат со дигиталните гиганти. Наместо тоа, „Бед, бат енд бијонд“ сами се најмногу виновни за сопствениот пад, според доставувачите, аналитичарите, поранешните менаџери и вработени. Речиси десет години менаџментот на компанијата носеше погрешни одлуки, кои полека но сигурно ја туркаа компанијата кон финансиски колапс.
Под долгогодишниот генерален директор Стив Темарес, компанијата потроши премногу ресурси за купување фирми како „Кост плус“ (Cost Plus World Market) во 2012 година и „Декориста“ (Decorista) во 2017 година, кои на крајот пропаднаа. Исто така, потроши милијарди долари за откуп на акции.
Depositphotos
Во исто време тие не инвестираа доволно во подобрување на своите интернет и логистички операции. Тоа ги стави во неповолна положба во однос на ривалите како „Таргет“ (Target), „Волмарт“ (Walmart) и „Лоус“ (Lowe's), кои почнаа да нудат брза испорака и опции како онлајн купување и подигање во продавница.
Пресврт
Поранешниот извршен директор на „Таргет“ (Target), Марк Тритон, го презеде „Бед, бат енд бијонд“ во 2019 година, кога изгуби удел на пазарот и забележа квартален пад на приходите. Со цел да се обидат да го спречат овој пад, тие одлучија да произведуваат повеќе сопствени производи и да ги намалат трошоците. Меѓутоа, во нивниот случај тоа резултираше со полици со премногу непознати производи со приватна етикета на сметка на познатите национални брендови.
„Мислам дека основната грешка беше одлуката да се насочат кон производи со приватна етикета“, рече аналитичарот на „Ес енд пи глобал рејтингс“ (S&P Global Ratings), Деклан Гарган, во интервју. „Нивните лојални клиенти не беа заинтересирани за тоа“.
Купувачите се повлекоа и продажбата опадна. Претходно оваа година, „Бед, бат енд бијонд“ се подготви да поднесе барање за стечај. Но, на изненадување на многу доставувачи и аналитичари, компанијата склучи договор во февруари да му ги продаде своите акции на хеџ-фондот „Хадсон беј“. Сепак, тоа собра само 360 милиони долари, многу помалку од целта од една милијарда долари.
Стечајот продолжи да им виси над глава. Потоа, на крајот на март, компанијата објави уште еден договор за финансирање, но овој пат без хеџ-фонд како посредник. Имено, „Бед, бат енд бијонд“ имаше неколку недели да им продаде акции вредни 300 милиони долари директно на инвеститорите. Сепак, потенцијалните купувачи беа главно незаинтересирани, а цената на акцијата продолжи со драстичен пад.
Bloomberg
Стечајот стана неизбежен, а работните места на илјадници вработени, нивните пензиски заштеди и испратнини сега се доведени во прашање.
Сепак, има и победници од колапсот на еден од најголемите американски синџири со стоки за домаќинство. Станува збор за компании што во последните неколку години го реструктурираа својот бизнис со цел успешно да се натпреваруваат со „Амазон“ и другите гиганти за онлајн продажбата. Побарувачката кај нив моментално расте.
„Таргет“, „Волмарт“ (Walmart), „Хоум гудс“ (HomeGoods) и самиот „Амазон“ се победници, забележува аналитичарот на „Глобал дата“ (GlobalData), Нил Сандерс. „Затворањето на продавниците на 'Бед, бат енд бијонд' го пренасочува нивниот промет кон други компании“, заклучи тој.
