„Алкалоид“ оствари добивка од 7,1 милиони евра за три месеци

„Алкалоид“ АД Скопје во првите три месеци од годинава оствари консолидирана нето-од  441,5 милиони денари (7,1 милиони евра), што е зголемување од 22 проценти во однос на истиот период минатата година.

Остварените консолидирани вкупни приходи во периодот јануари-март 2023 година изнесуваат 4,4 милијарди денари (72 милиони евра) и во споредба со остварените во истиот период во 2022 година бележат раст од 20 проценти. Во структурата на вкупните приходи, најголемо учество од 98 проценти имаат приходите остварени со продажба на производи и на услуги, кои во споредба со остварените во 2022 година бележат раст од 20 проценти.

„Од вкупните консолидирани продажби, 72 проценти се остварени на странските пазари. Најголем пораст кај извозните пазари бележат продажбите остварени во земјите од Источна Европа и во земјите од Западна Европа“, информираат од компанијата.

Во „Алкалоид“ во првото тромесечје од 2023 година се реализирани 47 нови вработувања, а со одлука Управниот одбор во март 2023 година е одобрен и исплатен регрес за користење годишен одмор за вработените во компанијата во висина од нето износ од 36.500 денари. Денес, групацијата „Алкалоид“ брои 2.678 вработени, од кои 2.039 се во земјата, а 639 се вработени во подружниците во странство.

Бизнис-планот за 2023 година предвидува инвестирање на околу 11 проценти од консолидираните приходи од продажби во материјални и во нематеријални средства, раст од 10 проценти на консолидираните продажби во однос на 2022 година, како и раст од 7 проценти на консолидираниот профит пред оданочување во однос на 2022 година.

„Бизнис-планот за 2023 година е базиран на очекувањата, проекциите и на можностите на тековните и на новите пазари и производи, достапни за компанијата во моментот на изготвување на планот. Околностите и настаните во 2023 година, а со тоа и остварените резултати, може да варираат од прикажаните во бизнис-планот“, велат од компанијата.

Оттаму додаваат дека во изминатиот период се соочиле со голем број интерни и екстерни предизвици и новонастанати ризици, генерирани од енергетската и економската криза.

„Презедовме голем број мерки во досегашниот период, со цел неутрализирање на сите негативни ефекти, без притоа да се загрози успешното работење на друштвото. Во согласност со очекувањата, она што доминираше во 2022 година, а продолжува и во првиот квартал од 2023 година е забележителниот раст на цените на голем дел од влезните суровини и материјали, енергенсите, како и порастот на цените на транспортот на глобално ниво, а особено и значителните пролонгирања на роковите за испорака. Сето ова влијае и на стапката на инфлацијата што веројатно како тренд ќе биде уште понагласен во периодот што следи“, укажуваат од компанијата.

Како најголем предизвик и прв приоритет за периодот што доаѓа за „Алкалоид“ и понатаму останува грижата за здравјето на вработените, како и одржувањето на тековната ликвидност, на финансиската стабилност и остварување на планските цели.

Во моментов нема коментари за веста. Биди прв да коментира...

Остави коментар