.webp){kind=icon}
„Морган Стенли“ (Morgan Stanley) подготвува нов круг кратења на работните места во услови на обновен фокус на трошоците, бидејќи стравувањата од рецесија го одложуваат враќањето кон склучување договори.
Високите менаџери разговараат за плановите за елиминирање на околу 3.000 работни места од глобалната работна сила до крајот на овој квартал, тврдат упатени извори. Тоа би изнесувало околу 5 отсто од персоналот, со исклучок на финансиските советници и персоналот што ги поддржува во одделот за управување со богатството.
Многу од кратењата се очекува да отпаднат на банкарската и трговската групација, посочува еден од изворите. Портпаролот на „Морган Стенли“, фирма со седиште во Њујорк што вработува околу 82.000 луѓе, одби да коментира.
Кратењата доаѓаат само неколку месеци откако компанијата намали околу 2 отсто од својата работна сила. Најголемите банки на Волстрит не понудија многу причини за славење додека известуваа за резултатите од првиот квартал, откако нивните такси од помагањето на компаниите при преземање и собирање капитал паднаа во текот на минатата година. Желбата на Федералните резерви (ФЕД) да ја ограничат инфлацијата преку зголемување на каматните стапки и банкарската бура што следуваше дополнително ја намалија активноста.
Главниот извршен директор Џејмс Горман рече дека минатиот месец активностите за преземања и спојувања се намалени и дека не очекува враќање пред втората половина на годинава или во 2024 година.
Во првиот квартал добивката на „Морган Стенли“ падна во однос на претходната година, намалена поради падот на склучени зделки, со пад од 32 отсто во советувањето за спојување и пад од 22 отсто во бизнисот со преземање акции. Аналитичарите прогнозираат дека приходите од банкарските провизии ќе бидат во согласност со минатогодишната ситуација - што беше приближно половина од 10,3 милијарди долари што банката ги повлече за време на треската со склучување зделки во 2021 година.
Приходите во рамките на групацијата за институционални хартии од вредност, во која се сместени банкарите и трговците, се намалени за 11 отсто во кварталот што заврши во март. Одделот за управување со богатство отиде во спротивна насока, искачувајќи се за 11 отсто во споредба со пред една година.
Резултатите од целата фирма покажуваат дека стапката на ефикасност на „Морган Стенли“ - мерка за некаматниот трошок во однос на приходите - достигнала 72 отсто. Банката како своја цел го наведе задржувањето на таа бројка под границата од 70 отсто.
Кратењата на работните места во финансискиот сектор се вратија по периодот на пандемијата, кога банките се откажаа од отпуштања за да им дадат стабилност на вработените, а потоа се бореа за таленти како што надојдоа зделките. Но, како што се олади таа треска, во фокус дојдоа трошоците, па неколку банки објавија планови за отпуштање на персоналот.
