.webp){kind=icon}
„Македонски телеком“ објави дека приходите од продажба во првото тримесечје годинава изнесуваат 2,9 милијарди денари, или над 47,1 милиони евра, што претставува раст од 3,7 проценти споредено со истиот период од претходната година. За таквите резултати најмногу придонесува зголемениот број на корисници. Имено, компанијата сега има за 3,3 отсто повеќе корисници во однос на првите три месеци од минатата година. Тоа резултираше со раст на приходите од мобилните услуги за 5,8 проценти на годишно ниво. Ги анализираме резултатите на компанијата во првите три месеци годинава.
„Растот на мобилните услуги е поттикнат од поголемата потрошувачка во постпејд-сегментот, како и од зголемените приходи од роаминг-услугите како резултат на растечката миграција на граѓаните во однос на првиот квартал од претходната година, период што делумно уште беше под влијание на ковид-19“, сметаат аналитичарите на „Блумберг Адрија“.
Според нив, конкурентските притисоци во ТВ-сегментот резултираа со пад (според интерните процени) на пазарниот удел на 33,6 проценти (наспроти 34,3 отсто колку што компанијата имаше во истиот период лани), како и со помали приходи од тој сегмент за 6,6 проценти.
Аналитичкиот тим на „Блумберг Адрија“ смета дека најголемиот притисок на профитабилноста произлегува од растот на трошоците за енергија за значајни 27 проценти и делумно компензираниот пад на амортизациските трошоци за 10 отсто.
„Растот на трошоците за енергија произлегува од општопознатите причини, но трошоците и натаму заземаат ниски 4,7 отсто од приходите од продажбата на ’Македонски телеком’, додека падот на амортизациските трошоци произлегува од помалата амортизација на комуникациската опрема како резултат на модернизацијата. И покрај високата стапка на инфлација од над 15 проценти, од која е погодена Македонија, ’Македонски телеком’ успешно ги држи своите трошоци под контрола, па, така, трошоците за вработените останаа на исто ниво како во првиот квартал минатата година. Освен помалите амортизациски трошоци, понизок е и трошокот за услуги, и тоа за 9,7 отсто, како резултат на приходите од системските решенија, кои се намалени за 40 отсто“, вели Матео Мошња, кој е дел од аналитичкиот тим на „Блумберг Адрија“.
Менаџментот на компанијата тврди дека дошло до значителен пад во тој сегмент исклучиво поради динамиката на признавање на приходите, па, соодветно на тоа, може да се заклучи дека се очекува раст во однос на периодите на споредба понатаму во текот на годинава.
Материјалните трошоци од продажба на уреди се зголемија за 11,2 отсто во однос на истиот период лани, а тој раст само делумно е надоместен од приходите, чиј раст е 5,8 проценти, што веројатно е резултат на силните промотивни активности поради забавената потрошувачка на населението.
„Очекуваме дека бројките од овој сегмент во продолжението од годинава дополнително ќе се влошат ако се земе предвид бруто-маржата, особено во последниот квартал. Очекуваме дека растот на приходите ќе биде нешто понизок од моменталниот, а материјалните трошоци и натаму ќе вршат притисок на профитот на ниво од висока едноцифрена стапка“, прогнозира нашиот аналитички тим.
Од компанијата информираа дека за разлика од 2022 година, кога оперативната добивка пред камати, оданочување и амортизација (ЕБИТДА), бележеше пад, во првите три месеци од годинава таа е зголемена за 5,6 проценти споредено со истиот период минатата година. И нето-добивката, соопштува „Телеком“, бележи пораст од дури 33,2 проценти.
„Со оглед на тоа дека трошоците за услуги се втора најзначајна трошковна категорија во пресметките за добивка и загуба, веднаш по трошоците за амортизација, нивниот пад во комбинација со растечките приходи резултираше со раст на ЕБИТДА за 5,6 проценти“, коментираат аналитичарите.
Компанијата очекува оваа година масовно мигрирање на корисниците од бакар на оптика во поголемиот дел од главниот град, како и во сите делови на државата каде што има оптичко покривање, посочувајќи дека продолжува ширењето и на 5Г-мрежата, која сега е достапна во 27 града и нивните околини.
Пристап до оптичката мрежа имаат 281.000 граѓани од Македонија, што претставува раст од 11 проценти во однос на првиот квартал минатата година. И покрај тоа, капиталните инвестиции значително се намалија и изнесуваат 523,8 милиони денари, односно 18,2 отсто од приходите од продажба, наспроти 710 милиони денари, колку што изнесуваат во истиот пресметковен период лани.
„Очекуваме дека во наредниот период ќе продолжи трендот на раст на приходите во рамките на ниска едноцифрена стапка, каква што гледаме во моментов, додека растот на ЕБИТДА ќе забави од моменталните 5,6 проценти поради континуираниот притисок од страна на материјалните трошоци, како и од посилните промотивни активности, чија цел е да се поттикне забавената потрошувачка“, прогнозираат аналитичарите на „Блумберг Адрија“.
