Американскиот министер за енергетика Крис Рајт ја предупреди Европската Унија дека испораките на американски гас ќе бидат пренасочени на други пазари доколку Унијата не ги ублажи правилата за намалување на емисиите на метан, моќен стакленички гас.
„Без значајна реформа на ова правило, Европа ќе се соочи со сериозни и непотребни проблеми“, изјави Рајт за „Блумберг“ на маргините на конференција во Њујорк. „Не станува збор за ескалација. Нашата енергија ќе продолжи да тече. Само ќе тече на друго место.“
Неговите коментари следуваат откако европскиот комесар за енергетика Дан Јоргенсен вети дека ќе се спротивстави на притисокот од САД и од другите извозници на течен природен гас (ЛНГ) за ревидирање на европските правила за намалување на емисиите на метан. САД претходно ја предупредија Унијата дека сложеноста на овие правила и можноста за парични казни може да ја загрозат трговијата. Министрите за енергетика на ЕУ треба да разговараат за оваа регулатива на состанокот во Луксембург во петок.
ЕУ стана сѐ позависна од САД додека се обидуваше да ги замени руските испораки по инвазијата врз Украина во 2022 година. Во исто време, справувањето со метанот – стакленички гас со многу поголем потенцијал за глобално затоплување од јаглеродниот диоксид – стана еден од клучните столбови на климатските цели на Унијата.
Разликите во климатските политики во однос на САД, кои најавија зголемување на производството на фосилни горива, претставуваат една од главните точки на несогласување. Дополнителен проблем е што следењето на емисиите на метан во сложениот американски систем со различни производствени басени е исклучително тешко, додека извозниците предупредуваат дека можноста за казни поради непочитување на правилата го отежнува склучувањето нови договори.
Ставот на Рајт е целосно различен од оној на администрацијата на Бајден, која заедно со ЕУ во 2021 година го покрена „Глобалната иницијатива за метан“ (Global Methane Pledge), со цел емисиите на метан до 2030 година да се намалат за најмалку 30 отсто во однос на нивото од 2020 година.
.webp){kind=icon}
