Европската централна банка (ЕЦБ) ја казнила банката „Голдман Сакс“ (Goldman Sachs Group Inc.) со 6,63 милиони евра откако нејзината подружница во Европа не ги пресметала правилно средствата.
Осум последователни квартали од 2019 до 2021 година, „Голдман Сакс бенк Јуроп“ (Goldman Sachs Bank Europe) погрешно ја класификувала изложеноста кон трговските друштва и применила понизок пондер на ризик отколку што пропишуваат банкарските правила, се наведува во соопштение на ЕЦБ објавено во понеделникот во Франкфурт.
„Голдман Сакс“ и нејзините ривали брзо ги проширија единиците во Европската Унија за да го задржат пристапот до клиентите откако брегзит прекина многу врски со нивните операции во Лондон. ЕЦБ се обидува да обезбеди банките да имаат контрола на ризиците по овој невиден прилив на големи банкарски институции.
„Ја препознаваме клучната важност на нашите обврски за регулаторно известување и ги презедовме сите неопходни чекори за целосно да го решиме ова прашање“, посочи портпаролот на „Голдман Сакс“ во одговор до „Блумберг“ испратен по е-пошта. „Соработуваме директно со ЕЦБ и задоволни сме што целосно ги решивме работите“.
Податоците на компанијата покажуваат дека европската единица на банката значително ги надминала барањата за капитал во последните години, што сугерира дека недостатоците нема да предизвикаат паѓање под минималното ниво поставено од ЕЦБ.
ЕЦБ исто така соопшти дека проблемите со внатрешната контрола на банката ја спречиле „навремено да ја открие оваа грешка“.
.webp){kind=icon}
