.webp){kind=icon}
Државната ЕСМ понуди за 17 отсто повисока цена за струјата за периодот јули – декември. Универзалниот снабдувач ЕВН Хоме по денешната електронска аукција објави дека во следниот период ЕСМ ќе ја продава струјата по цена од 48 евра за мегават час.
Само ЕСМ се јави на тендерот на универзалниот снабдувач и понуди дека стопроцентно ќе ги обезбеди планираните количини струја за наредните шест месеци иако потрошувачката е зголемена за 27 отсто.
„Добиената купопродажна цена од 48 еврa за мегаватчас за периодот Јули-Декември 2022 e за 17% повисока од претходната која беше добиена на последниот тендер на Универзалниот снабдувач (Јануари-Јуни 2022), кога АД ЕСМ понуди купопродажна цена на електрична енергија од 41 евро за мегаватчас за вкупните планирани потреби на ЕВН Хоме како Универзален снабдувач“, соопшти ЕВН.
Сега на потег е Регулаторната комисија за енергетика која треба да ја утврди цената која ќе ја плаќаат домаќинствата во втората половина од година. При пресметките, РКЕ во предвид ќе ги земе трошоците на МЕПСО, МЕМО, Дистрибутивниот систем оператор Електродистрибуција, како и за 17 отсто повисоката цена што денеска ја понуди ЕСМ. МЕПСО побараа поскапување на тарифата за пренос за 68 отсто, а Електродистрибуција за 80 отсто.
Регулаторна треба да одлучи кои од овие пресметки ќе бидат признаени како трошок, и најверојатно идната недела ќе ја објави новата, повисока, цена на струјата која ќе важи до Нова година. Таа цена ќе важи за домаќинствата, за правните лица важат други тарифи.
Последен пат струјата поскапе во декември за 9,48 отсто, а тогаш ЕСМ понуди 13,6 отсто повисока цена. До декември мегавт го продаваше по цена од 36 евра, а од јануари до јуни по цена од 41 евро.
Освен поскапа струја, од 01 јули домаќинствата ќе трошат струја и во нови блок тарифи. Според Регулатрона, целта на новиот модел на плаќање е тие што трошат повеќе, да плаќаат поскапо и да се стимулира шштедењето на енергијата.
Планирани се четири блок тарифи и тоа, првата до 210 киловат часови, втората до 420, третата до 730 и четвртата над тоа. Овие прагови ќе важат само за висока тарифа, односно нема да се однесуваат на евтината струја во ноќните часоови. Според проценките на регулаторите, домаќинствата кои ќе се вклопат во првите две блок тарифи ќе плаќаат помалку или исто како сега, останатите – повеќе.
