„Сименс“ (Siemens AG) ги зголеми своите прогнози по вторпат во фискалната 2023 година, откако приходите и нарачките скокнаа, а главните бизниси на компанијата ги спојуваа индустриските производи со дигитални решенија што го поттикнаа резултатот.
Според објавата на германската компанија, приходите на годишно ниво пораснале од 9 до 11 проценти, што доведе до зголемување и на очекуваната заработка по акција.
По порастот на побарувачката во текот на фискалниот втор квартал, од „Сименс“ објавија дека нарачките ќе се нормализираат во текот на втората половина. Индустриските производители како „Сименс“ имаат корист од подобрувањето на проблемите со синџирот на снабдување и побарувачката, која добро се одржува и покрај затемнетата глобална перспектива. „Сименс“ доби индиска нарачка за електрични локомотиви од 3,2 милијарди долари.
Во главните сектори на „Сименс“, дигитални индустрии и паметна инфраструктура, сликата е мешана. Додека профитот се зголеми, нарачките во единицата што произведува фабрички производи и поврзани дигитални услуги паднаа за 10 проценти. Компанијата и покрај тоа ја зголеми прогнозата за профитна маржа за дигиталните индустрии на дури 23,5 проценти, од претходните 22 отсто.
Во паметната инфраструктура, со производи што им помагаат на зградите да го намалат нивниот јаглероден отпечаток, нарачките се зголемија за девет отсто, а „Сименс“ ги зголеми и очекувањата за приходите и повратот.
Компанијата ги жнее резултатите од големото стратегиско ресетирање на својот бизнис, отфрлајќи ја тешката опрема во корист на производствени линии управувани од софтвер со повисоки нивоа на профитабилност. Продаде многу од своите помали сектори, а паралелно направи разграничувања на бизнисите, како што се производителот на гасни турбини „Сименс енерџи“ (Siemens Energy AG) и производителот на опрема за здравствена заштита „Сименс хелтинерс“ (Siemens Healthineers AG).
Во текот на фискалниот втор квартал, споредливите приходи се зголемија за 15 проценти, на 19,4 милијарди евра, надминувајќи ги процените на аналитичарите од 18,7 милијарди евра. Нето-приходот се зголеми на 3,48 милијарди евра, што исто е над процените на аналитичарите од 3,1 милијарди евра.
.webp){kind=icon}
