.webp){kind=icon}
Eден од основачите на „Гугл“ (Google), Сергеј Брин во четвртокот донирал акции на компанијата „Алфабет“ (Alphabet) во вредност од околу 600 милиони долари. Во текот на истата недела неговото богатство се зголеми најмногу во последните две години.
Поднесокот објавен во понеделникот не прецизира на кого му биле подарени 5,2 милиони акции, кои се рамномерно поделени помеѓу новоконвертирани акции од класа А и класа C. Тие можеби биле дадени во добротворни цели, фонд или фондација.
„Гугл“ не одговори на барањето за коментар.
Брин и Лери Пејџ, кои заедно го основаа технолошкиот гигант, минатата недела забележаа раст на нивното богатство за 18 милијарди долари, што е најмногу од февруари 2021 година, откако инвеститорите поради вештачката интелигенција ги зголемија акциите на „Алфабет“. Ден пред да ги подари акциите, компанијата со седиште во Маунтин Вју, Калифорнија, објави дека лансира поинтерактивен пребарувач и дека ќе го напправи четботот со вештачка интелигенција подстапен за широката јавност.
Според индексот на милијардери на „Блумберг“, нето вредноста на Брин сега е 100,7 милијарди долари. Неговото богатство, деветто по големина во светот, главно се состои од комбинација на акции од „Алфабет“ од B и C класа. Според податоци собрани од „Блумберг“, тој од првичната јавна понуда на компанијата во 2004 година, има продадено акции вредни над 10 милијарди долари.
Брин и на крајот на минатата година подари околу милион акции. Покрај тоа, тој искористи дел од акциите на „Алфабет“ за да основа нова непрофитна организација, „Каталист 4“ (Catalyst4), фокусирана на здравјето и климатските промени. Податоците покажуваат дека најголем дел од капиталот на организацијата доаѓа од акциите на „Тесла“, кои беа продадени во време кога нивната вредност беше блиску до врвот, на крајот на 2021 година.
