Познатиот ресторан во Копенхаген, Noma, кој во повеќе наврати беше прогласуван за најдобар во светот, во 2021 година загуби пари за прв пат по четири години, дури и откако доби поддршка за Ковид-19 од данската влада.
Сопственик на Noma е еден од најпознатите готвачи во светот, Рене Реџипи, со потекло од тетовско Џепчиште, инаку роден во данската престолнина.
Ресторанот пријавил нето загуба од 1,69 милиони круни (240.000 американски долари) откако забележа мал профит во 2020 година, според пријавата до Данскиот деловен орган. Noma добил 10,9 милиони круни како владина мерка бидејќи Данска во текот на годината имаше заклучувања поради пандемијата.
Ресторанот кој на своето мени нуди ручек од зеленчук во комбинација со вино за околу 700 долари по лице, моментно е рангиран на првото место на листата на 50 најдобри ресторани во светот, откако вкупно пет пати ја освои главната награда. Има и три „мишелин ѕвезди“.
Последен пат Noma беше непрофитабилен во 2017 година, кога сопственикот Рене Реџепи го затвори на околу една година заради обнова. Ресторанот, исто така, планира и годинава привремено да затвори во Копенхаген и да направи кулинарска турнеја во други земји пред да се врати во 2023 година.
„Во дадените околности, резултатот и економскиот развој на компанијата беа задоволувачки. Компанијата очекува подобрен резултат за следната година“, посочува Noma во својот финансиски извештај за 2021 година.
.webp){kind=icon}
