Законот за данокот на солидарност се носи без соодветна консултација со бизнисот, и покрај тврдењата на министерот за финансии дека имало повеќе јавни дискусии, тврдат од Стопанската комора и од Советот на странски инвеститори.
„Потврда за тоа дека и при јавни расправи забелешките на бизнисот не се земени предвид е и првиот допис што беше доставен од Комората до министерот за финансии на 26 декември минатата година, со конкретни укажувања на тогаш именуваниот предлог на закон за дополнителен данок на добивка (подоцна преименуван во закон за данок на солидарност), во кој посочивме дека е суштински важно да се дефинира поимот екстра-профит за да не се случи да се даночат компании што оствариле позитивни резултати на база на нивното добро работење, зголемени инвестиции, подобрена продуктивност, освојување нови пазари и слично“, велат денеска од Комората.
Според нивните тврдења, во повеќе наврати во изминатите шест месеци не успеале да ги убедат Владата и министерот дека е беспредметно да се носи ваков акт, па во јуни поднеле иницијатива за стопирање на постапката за донесување на предлогот на законот за данок на солидарност. „На 4 јули преку јавноста повторно баравме да се повлече и да се стопира постапката за носење на законот за данок на солидарност, со укажување дека носењето вакво законско решение создава несигурност кај постојните и потенцијалните инвеститори, особено ако се има предвид дека правната сигурност е еден од врвните приоритети за кои се залагаме како застапувачи на интересите на бизнис-заедницата во земјата“.
Оваа комора ги застапува компаниите што создаваат половина од вкупниот приход во приватниот сектор, генерираат речиси половина од нето-добивката во приватниот сектор и вработуваат повеќе од една третина од вработените во приватниот сектор. Оттаму велат дека пред шест дена, односно на 19 јули повторно пратиле допис до претседателот на Собранието, но и до премиерот и министерот за финансии. „Во дописот на еден сеопфатен начин се образложени аргументите за барањето на бизнис-заедницата за запирање на постапката за донесување на предложениот закон за данок на солидарност, по итна постапка со европско знаменце“.
Во денешното соопштение велат дека Стопанската комора останува на ставот дека докрај ќе настојува, преку правните механизми што ѝ се на располагање (како последна инстанца поднесување иницијатива пред Уставниот суд), да се спречи ставањето во функција на овој закон, кој претставува репутациски ризик за државата и ја продолжува правната несигурност, која постои повеќе децении.
.webp){kind=icon}
