„Порше“ бара партнери за фабрика за батерии од три милијарди евра

„Порше“ разговара со потенцијални финансиски и стратегиски партнери за изградба на фабрика за батерии за електрични возила, која би можела да чини дури три милијарди евра.

Како што беше објавено во средата, производителот на луксузни автомобили размислува за локации во близината на Германија, САД и Канада, а одлуката ќе зависи од конкурентните цени на електричната енергија и достапноста на обновлива енергија. Фабриката ќе има капацитет од дури 20 гигават-часа.

„Важно е точно да се одредат трошоците за енергија“, изјави за медиумите главниот финансиски директор Луц Мешке.

„Порше“ е под притисок да ја забрза транзицијата кон електрични возила откако технички проблеми ја одложија промоцијата на клучните модели, вклучувајќи го и електричниот „макан“ (Macan). Испораките на „тајкан“ (Taycan), единствениот целосно електричен модел, паднаа за пет проценти во првата половина од годината поради намалената достапност на делови.

Извршниот директор Оливер Блуме рече дека фабриката за батерии треба да биде блиску до Германија, бидејќи повеќето од автомобилите на „Порше“ се произведуваат таму. Сепак, тој истакна дека САД стануваат поатрактивни поради помалата бирократија и субвенциите предвидени со Законот за намалување на инфлацијата.

„Порше“ е сопственик на компанијата „Селфорс“ (Cellforce), која произведува батериски ќелии со високи перформанси, а веќе има инвестирано во фабрика од 1,3 гигават-часа во југозападна Германија. Исто така купува ќелии од трети доставувачи и работи со „Пауер ко“ (PowerCo), компанија на „Фолксваген“ за батерии за електрични возила.

„Поради интензивното зголемување на електрификацијата, има широк опсег на можности кога станува збор за батериски ќелии“, рече Блуме. „Мора да бидеме флексибилни за да ја поставиме вистинската технологија“.