.webp){kind=icon}
Комерцијална банка оствари добивка од 32,6 милиони евра во првото полугодие, покажуваат резултатите од неревидираниот финансиски извештај. Оваа добивка е за над 77 отсто повисока од остварената во првото полугодие лани, кога изнесуваше 18,3 милиони евра.
Од компанијата соопштија дека планираната бруто-добивка за првото полугодие од годинава е остварена со 131,4 проценти, а остварената добивка пред исправка на вредност, која претставува показател за оперативната способност на банката да ги покрива расходите од работењето, е за 50,4 проценти поголема во однос на истиот период минатата година. „Зголемувањето на добивката пред исправка на вредност главно произлегува од зголемувањето на приходите од редовно работење, односно од нето-приходите од камати што бележат значително зголемување, што се должи на континуираниот пораст на основната каматна стапка на Народната банка и на каматните стапки на странските финансиски пазари, во комбинација со структурата на активата на банката, покажуваат податоците.
Според билансот на успех, вкупните приходи од работењето од јануари до јуни се на ниво од 53,7 милиони евра или за 32 проценти повисоки во однос на истиот период од минатата година. Во вкупните приходи најголем удел имаат приходите од камата што оваа година се зголемиле за 82,1 процент во однос на истиот период од минатата година, под влијание на затегнатата монетарна политика и зголемените каматни стапки. „Најголемо влијание во зголемувањето на каматните приходи има порастот на каматата од нерезиденти, финансиски друштва и држава. Иако е остварен пораст и на приходите од камати на кредитите дадени на правните лица и населението, тој е во помал обем споредено со претходните категории“, покажуваат податоците.
Прочитај повеќе
Македонски компании со профитни маржи од кои боли глава
На врвот на листата компании со највисоки профитни маржи се наоѓаат големите македонски банки
07.06.2023
Висок старт на Комерцијална банка: Профит од 16,9 милиони евра за три месеци
Првпат приходите од камати кај финансиските друштва и нерезидентите збирно се значително поголеми од приходите од каматите кај населението
27.04.2023
Комерцијална банка ќе подели дивиденда од 500 денари по акција
Комерцијална банка ќе распредели дивиденда во висина од над 18,5 милиони евра за 2022 година.
24.02.2023
Комерцијална банка лани оствари добивка од 35 милиони евра
Позитивниот резултат од работењето банката го оствари во кризна година, велат од Комерцијална банка
26.01.2023
Овие резултати се остварени во услови на остро затегнување на монетарната политика. Каматната стапка Еурибор, која во првата половина од 2022 година беше околу нула или негативна, оваа година беше во опсегот од 3,5 отсто до четири проценти. Во истиот период растеше и основната камата на Народната банка.
„Нето-каматната маржа на ниво на банката се зголеми од два процента заклучно со крајот на првото полугодие од минатата година, на 3,43 отсто заклучно со јуни годинава.
Оперативните расходи за периодот 1.1-30.6.2023 година изнесуваат 16,7 милиони евра и во однос на истиот период од минатата година се зголемени за 3,9 проценти, што е резултат на зголемениот износ на платите и други трошоци на вработените поради зголемувањето на вредноста на бодот во два наврата, како и зголемената амортизација. Во периодот од јануари до јуни, банката прокнижила загуба поради оштетување на нефинансиските средства на нето основа во износ од 1,4 милиони денари, во согласност со регулативата од НБРСМ. Во извештајниот период банката прокнижила исправка на вредност на финансиските средства и посебна резерва за вонбилансни изложености на нето-основа во износ од 266,8 милиони денари, наспроти 375,9 милиони денари во истиот период минатата година. Намалувањето кај исправката на вредност на финансиските средства е во согласност со намалувањето на цените на енергентите во изминатиот период.
Инаку, вкупната актива на Комерцијална банка изнесува 155.895,8 милиони денари (2,5 милиони евра) и во однос на декември 2022 година бележи зголемување од 3,3 проценти. Зголемувањето на вкупната актива се должи на зголемувањето кај вложувањата во хартии од вредност, како и поради зголемените кредити на коминтенти и зголемените кредити и побарувања од банки.
Вкупните депозити (депозити на коминтенти и депозити на банки) достигнаа износ од 137.586,4 милиони денари (2,2 милиони евра) и бележат зголемување од 3,1 проценти.
Очекувањата на банката за следниот период, како што стои во извештајот, се условени од продолжените геополитички тензии од воената инвазија на Русија врз Украина, бавното економско закрепнување, како и домашните политички случувања. „Ваквиот амбиент дејствува неповолно врз изгледите за раст на домашната економија. Високото ниво на неизвесност во домашната економија и на меѓународен план упатува на потребата од поконзервативен пристап во обликувањето на очекувањата за 2023 година, при што се земени предвид проекциите објавени од Министерството за финансии, Народната банка на Република Северна Македонија, Меѓународниот монетарен фонд и Светската банка“, додаваат оттаму.
Се најавува дека банките ќе ги следат сигналите на Народната банка во однос на монетарната политика и соодветно ќе ги коригираат каматните стапки на депозитите и кредитите. „Комерцијална банка ќе ги презема сите неопходни активности за приспособување кон новонастанатите состојби, при што и во следниот период ќе биде фокусирана пред сѐ на одржување на квалитетот на портфолиото и наоѓање флексибилни решенија на барањата на клиентите, ефикасно управување со трошоците, натамошна дигитализација на процесите и модернизација на деловната мрежа“, се наведува во образложението кон финансиските резултати.
