.webp){kind=icon}
„Ново Нордиск“ (Novo Nordisk A/S) штотуку достигна уште една пресвртница во својот метеорски раст: пазарната вредност на данската компанија ја надмина големината на националната економија.
Акциите се зголемија неделава поради вестите дека лекот за слабеење „вегови“ (Wegovy) штити од срцев удар. Добивката ја катапултира пазарната капитализација над 2,87 билиони круни (423 милијарди долари), повеќе од бруто-домашниот производ на Данска во 2022 година, и значи дека „Ново“ е сериозен претендент за титулата највредна европска компанија.
„Ново“ веќе стана највредна компанија во Данска во 2008 година, престигнувајќи го џинот на контејнерскиот транспорт „Маерск“ (A.P. Moller-Maersk A/S), а јазот меѓу двете фирми оттогаш се зголемува. Сега компанијата вреди повеќе од комбинираната вредност на сите други компании во данскиот бенчмарк-индекс OMXC25, помогната од зголемената продажба на лекови за третман на дебелина и дијабетес.
Прочитај повеќе
Лек за слабеење штити од срцев и мозочен удар
Лекот „вегови“ ги зголеми акциите на данската компанија „Ново Нордиск“ за 16,7 отсто.
09.08.2023
Лековите за слабеење го зголемија ентузијазмот на Волстрит
Акциите на фармацевтските компании бележат висок раст.
09.08.2023
„'Ново' стана многу доминантна акција во Данска, а компанијата исто така има значително влијание врз данската деловна заедница“, рече по телефон Џозефин Цети, главен стратег во одделот за управување со средства и богатство на „Норде банк“ (Nordea Bank Abp). „'Ново' на некој начин помогна данските акции да добијат печат за квалитет, бидејќи успехот на компанијата се прелева и на другите компании во очите на инвеститорите“.
Берзата во Копенхаген веќе го промени својот бенчмарк-индекс во 2013 година, бидејќи „Ново“ порасна премногу и сочинуваше околу 45 отсто од тој репер. Индексот сега е ограничен, што значи дека тежината на поединечните акции не може да надмине 20 отсто. Доколку стариот индекс се користеше и денес, „Ново“ ќе имаше удел од 58 отсто.
„Да се има успешна компанија како 'Ново' веројатно им помогна и на другите дански фармацевтски компании да добијат подобар пристап до финансирање“, рече Цети, додавајќи дека дејствувањето како извор на таленти „помогнало да се издигне квалитетот на данските компании“.
Останува уште малку пат за „Ново“ да ја достигне доминантната позиција што „Нокија“ (Nokia Oyj) ја имаше со години во блиската Финска. Во 2000 година, во периодот кога пукна балонот на dot-com, технолошката компанија беше највредната компанија во Европа, кога сè уште произведуваше мобилни телефони. Нејзината пазарна капитализација беше двојно поголема од финската економија и сочинуваше околу 4 отсто од БДП на земјата.
