.webp){kind=icon}
Вработените во „Мета“ (Meta Platforms Inc.) полека почнуваат да уживаат повеќе кога влегуваат во канцеларија, опоравувајќи се од кризата што настана откако 20.000 нивни колеги беа отпуштени во текот на изминатата година. Една причина: компанијата заживеа голем број популарни поволности од пред пандемијата, од брендирани маици до т.н. happy hours.
Работниците го минаа поголемиот дел од годината плашејќи се за своите работни места за време на кратењата. Продуктивноста се забави бидејќи вработените не беа сигурни на што да работат или дали воопшто треба да работат. Вработените кои ги преживеаја отпуштањата беа тажни што нивните пријатели веќе не се во компанијата и што поволностите - малите додатоци кои ја правеа работата забавна - беа намалени, велат повеќе сегашни и поранешни работници.
Марк Закерберг
Bloomberg
Сега, цели оддели во „Мета“, компанија која ги поседува Инстаграм, Ватсап и Месинџер, повторно нарачуваат свои брендирани маици, нешто што не би се сметало вредно за трошок во изминатите осум месеци, за време на прогласената „година на ефикасност“ од страна на главниот извршен директор Марк Закерберг. Еден вработен рече дека го гледаат ова како позитивен знак за перформансите на компанијата, откако два последователни квартала ги надминаа очекувањата на Волстрит за профитот и приходите. „Мета“, исто така, почна повторно да вработува некои работници кои претходно беа отпуштени, велат упатени, кои побараа да останат анонимни бидејќи откриваат информации за условите на работното место.
Во седиштето на компанијата во Менло Парк, Калифорнија, повеќето ресторани се повторно отворени по затворањето за време на пандемијата. Вечерата, која порано беше доцна навечер, е поместена за 18 часот, велат вработените. Услугите за перење алишта и фризури исто така се вратија, во четврток се одржуваат happy hours, а одредени продавачи поставија штандови за храна - што ја прави попривлечна работата од канцеларија, сега кога таа е задолжителна три дена во неделата.
Портпаролот на „Мета“ потврди дека компанијата ги враќа поволностите како што вработените се враќаат во канцеларија. Некои од нив никогаш не ни биле скратени. „Вечерата, happy hour и дружењето никогаш не исчезнаа, само беа приспособени во однос на пандемијата и буџетите“, рече портпаролот.
Вработените не само што забележуваат дека постојат поволности, туку се чини и дека ги прифаќаат - контраст од минатата есен, кога снек-баровите на „Мета“ почнаа да изгледаат сомнително празни, велат тие.
Сега, неколку месеци по последните отпуштања, работниците имаат желба да се поврзат и да планираат едни со други. Вибрациите се многу попозитивни, а расположението е подобро, вели еден работник, кој е највозбуден поради враќањето на вечерата. Друг, кој неодамна ја напуштил компанијата, вели дека му се допаднало отворањето на бесплатната кафетерија - нова поволност што ја немало пред отпуштањата.
Ресторан во една од деловните згради на „Мета“ во Менло Парк во 2018 година
Bloomberg
Моралот во „Мета“ отсекогаш внимателно ги следел перформансите на акциите на компанијата, кои годинава се зголемија повеќе од двојно, на 18-месечен максимум, делумно благодарение на декларацијата за „ефикасност“ на Закерберг и неговиот притисок за имплементација на вештачка интелигенција. „Мета“ предвиде двоцифрен раст на продажбата за тековниот квартал.
Но, компанијата сè уште се справува со некои егзистенцијални закани: растот на корисниците и приходите на нејзините водечки социјални мрежи стагнираат; напорите за виртуелна реалност на Закерберг продолжуваат да ги трошат ресурсите; а напредокот во вештачката интелигенција е скап и во рана фаза.
Покрај тоа, во одредени области и натаму се очигледни кратењата на трошоците. Одредени поволности не се толку добри како што беа пред отпуштањата, велат работниците. Услугата за перење алишта во „Мета“, на пример, порано беше бесплатна, но компанијата сега наплаќа за неа. Некои вработени сметаат дека храната веќе не е толку добра. А некои позиции сè уште се кратат, или барем не се пополнуваат кога некои вработени ќе си заминат, објаснуваат работниците.
Ако компанијата повторно се сврти и направи уште едно големо кратење на работните места, целиот напредок кон враќање на моралот ќе биде изгубен, вели еден работник.
