„Ролс-ројс“, (Rolls-Royce Holdings Plc) најави дека ќе укине околу 2.500 работни места и ќе го поедностави работењето. Тоа ќе биде најголемиот бран на отпуштања во компанијата под раководство на Туфан Ергинбилгиќ.
Помеѓу 2.000 и 2.500 вработени, или околу шест отсто од глобалната работна сила на „Ролс-ројс“, ќе бидат отпуштени, се наведува во регулаторната пријава на компанијата, која ја потврди веста за отпуштањата објавени во понеделникот попладне. Во рамките на корпоративната реконструкција, директорката на технолошкиот сектор Грација Витадини, според најавата, ќе ја напушти компанијата во април следната година.
Ергинбилгиќ се обидува да направи коренити промени во компанијата, откако смени неколку луѓе на клучни раководни позиции, меѓу кои и директорот на филијалата за производство на мотори за цивилни возила. Одделите за технологија и безбедност ќе бидат обединети и предводени од Сајмон Бур, висок менаџер во одделот за цивилна авијација, кој ќе му се приклучи на извршниот тим како дел од овие промени, соопшти компанијата.
Кога се пресели во „Ролс-ројс“ од БП (BP Plc), Ергинбилгиќ со себе донесе советници за да ја насочат организацијата. Компанијата прави мотори за најголемите комерцијални авиони и заработува врз основа на тоа колку часови се во служба, како и од многу профитабилни договори за одржување.
Bloomberg
„Ова е уште еден чекор во повеќегодишното патување за трансформирање на „Ролс-ројс“ во конкурентна издржлива компанија со високи перформанси“, се наведува во изјавата на извршниот директор.
Директорот, кој го спореди „Ролс-ројс“ со „запалена платформа“ набргу откако се приклучи на компанијата на почетокот на годината, беше на чело кога акциите се зголемија повеќе од двојно, благодарение на закрепнувањето на долгите патувања, што ја поттикна побарувачката за големи авиони како што е „ербас A350“, за кој „Ролс-ројс“ е единствен снабдувач.
Околу половина од вработените во компанијата се во Велика Британија, 11.000 работат во Германија, а околу 5.500 од нив се во Соединетите Американски Држави. Компанијата последен пат укина голем број работни позиции на почетокот на пандемијата на ковид, кога повеќето авиони низ светот беа приземјени.
Готовинскиот тек во „Ролс-ројс“ драстично порасна оваа година, олеснувајќи го товарот на плаќањата на каматите во време кога каматните стапки растат и ги зголемуваат трошоците за задолжување. Забрзаното намалување на долгот може да доведе до подобар кредитен рејтинг на компанијата, се наведува во извештајот на „Блумберг“.
.webp){kind=icon}
