„Нетфликс“ ги зголемува цените на некои пакети

„Нетфликс“ (Netflix Inc.) ги зголемува цените за некои клиенти во САД, Велика Британија и Франција. Одлуката доаѓа откако компанијата оствари најголем квартален раст на претплатници во последните години. Најголемиот сервис во светот за платена стриминг програма вчера објави дека бројот на претплатници се зголемил за 8,76 милиони во третиот квартал, што е далеку над прогнозите на аналитичарите и ја зголеми вкупната база на претплатници на 247,2 милиони. Според компанијата тоа се должи на силната програмска листа и на спречувањето да се споделуваат лозинки.

Инвеститорите беа загрижени дека „Нетфликс“ може да изгуби клиенти доколку ги принуди луѓето кои споделуваат сметки да купат свои претплати. Но, репресијата доведе до пораст на нови клиенти без поголемо зголемување на откажувањата. „Нетфликс“ сега е на пат да додаде повеќе од 20 милиони клиенти оваа година, што е голем скок од безмалку 9. милиони нови корнисици во 2022 година.

Акциите на „Нетфликс“ се зголемија за цели 13 проценти до 392 долари по објавувањето на резултатите. Тие се зголемија за повеќе од 17 проценти од почетокот на годината надминувајќи ја добивката од 12 проценти на индексот S&P 500.

Успешното ширење на платеното споделување, кое им овозможува на клиентите да купат дополнителен пристап за пријателите или семејството, го охрабри „Нетфликс“ да ги зголеми цените на некои од неговите најголеми пазари. Почнувајќи од вчера, компанијата ги зголемува цените за најскапиот пакет во САД за 3 долари до 23 долари и за основниот пакет за 2 долари до 12 долари, додека ги задржува актуелните цени на двата други пакети. Компанијата презема слични чекори во Велика Британија и Франција.

Европа, Блискиот Исток и Африка имаат најголем удел во растот на „Нетфликс“ во третиот квартал. Компанијата додаде речиси 4 милиони клиенти во тој регион.

Овој квартал, „Нетфликс“ предвидува приход од 8,69 милијарди долари и заработка од 2,15 долари по акција, и двете малку под проекциите на Волстрит. Компанијата рече дека дополнувањата на претплатниците ќе бидат слични на штотуку завршениот квартал, плус или минус неколку милиони.

Придобивките од спречувањето да се споделуваат лозинките ќе продолжат во следните неколку квартали бидејќи „Нетфликс“ го спроведува планот во фази.

„Ние сме неверојатно задоволни од тоа како се одвиваше“, рече ко-главниот извршен директор Грег Питерс во видео интервју по објавувањето на резултатите.

Спречувањето на споделување лозинки е една од неколкуте главни иницијативи на „Нетфликс“, која се обидува да го оживее растот по бавната година или две. Компанијата, исто така, објави верзија на своите услуги за стриминг поддржана од реклами на 12 пазари. Околу 30 проценти од новите клиенти на тие пазари се одлучија за реклами минатиот квартал, соопшти компанијата.

Во моментов нема коментари за веста. Биди прв да коментира...

Остави коментар