Еден од главните ликови за ВИ, Сем Алтман, отпуштен од „Опен еј-ај“

Сем Алтман, една од најистакнатите личности во областа на вештачката интелигенција, ја напушта „Опен еј-ај“ (OpenAI), објави во петокот одборот на компанијата. Главниот директор за технологија Мира Мурати ќе биде привремен извршен директор.

„Заминувањето на Алтман следи по процес на преглед од страна на одборот, кој заклучи дека тој не бил постојано искрен во комуникацијата со одборот, попречувајќи ја неговата способност да ги извршува своите одговорности“, се вели во соопштението на компанијата. „Одборот повеќе нема доверба во неговата способност да продолжи да го води 'Опен еј-ај'“.

„Опен еј-ај“ е водечки играч во сферата на вештачката интелигенција и е во преговори за продажба на акции од вработени на инвеститори во вредност од 86 милијарди долари - бројка што ќе ја направи компанијата една од најголемите стартапи во светот. Нејзините популарни производи, како што се ЧетГПТ (ChatGPT) и Дал-и (Dall-E), ја внесоа генеративната вештачка интелигенција во мејнстримот. Генеративната вештачка интелигенција е технологија која е обучена со огромни количини дигитални податоци и може да произведува содржини кои изгледаат како креирани од луѓе, како што се слики, текст и кодови.

Основана во 2015 година, компанијата го објави ЧетГПТ пред околу една година, предизвикувајќи голем интерес за технологијата за вештачка интелигенција. Околу 100 милиони луѓе користат ЧетГПТ секоја недела, соопшти компанијата во ноември, а повеќе од 90 проценти од Fortune 500 компаниите создаваат сопствени алатки на платформата „Опен еј-ај“. Компанијата го нуди својот софтвер за бизниси и е на пат да генерира околу милијарда долари годишен приход, објави „Блумберг“ во август.

Во исто време, „Опен еј-ај“ се соочува со зголемена конкуренција од добро финансирани ривалски производи развиени од други стартапи и технолошки гиганти, вклучително и „Гугл“ на „Алфабет“ (Alphabet Inc).

Во моментов нема коментари за веста. Биди прв да коментира...

Остави коментар