„ОИЛКО“ сака да го преземе „Макпетрол“

Командитното друштво со акции за транспорт „ОИЛКО “ планира да објави понуда за преземање на најголемата македонска нафтена компанија „Макпетрол“. „ОИЛКО“ во моментов поседува 22,8 проценти од вкупниот број обични акции во „Макпетрол“ и сака да ги презеде останатите акции по цена од 67.001 денар за акција. Акционерите на „ОИЛКО“ за планот за преземање ќе гласаат на седница на Собранието закажана за 20 јануари 2024 година.

„Се одобрува голема зделка со заинтересирана страна, каде страна во зделката се сите сопственици на обични акции со право на глас од издавачот ,,Макпетрол“ А.Д. – Скопјe, освен „ОИЛКО КДА“ - Скопје и физичките лица кои дејствуваат заеднички со него - сопственици на обични акции со право на глас.“, пишува во предлог одлуката за преземање.

Во неа се додава дека „се одобрува „ОИЛКО КДА“ – Скопје, да спроведе постапка за преземање на обични акции со право на глас, издадени од „Макпетрол“ АД - Скопје, со јавна објава на задолжителна понуда за преземање, согласно Законот за преземање на акционерските друштва“.

„Постапката за преземање, во име и за сметка на „ОИЛКО КДА“ - Скопје, да се одвива преку „Комерцијална банка“ А.Д.- Скопје – Дирекција за вршење на услуги со хартии од вредност, овластен учесник на пазарот на хартии од вредност, согласно Законот за хартии од вредност.“, пишува во предлог одлуката.

Се предвидува понудата за преземање да се однесува на 72.644 обични акции со право на глас, издадени од ,,Макпетрол“ А.Д. - Скопје, кои не се во сопственост на „ОИЛКО КДА“ - Скопје и физичките лица кои дејствуваат заеднички со него. 

Издавачот, ,,Макпетрол,, А.Д.- Скопје, има издадено 112.382 обични акции со право на глас, од кои 11.238 се сопствени акции без право на глас, а 28.500 обични акции, со право на глас, се во сопственост на „ОИЛКО КДА“ - Скопје и физичките лица кои дејствуваат заеднички со него.

„Во понудата за преземање, се утврдува праг на успешност од 50.000 обични акции со право на глас, што претставува 44,49 проценти од вкупниот број обични акции со право на глас издадени од „Макпетрол“ А.Д. – Скопје. Рокот за прифаќање на понудата да биде утврден на 28 дена, од денот на објавувањето на понудата за преземање, согласно можноста предвидена во Законот за преземање на акционерските друштва.“, пишува во предлог оодлуката.

Инаку, меѓу акционерите кои поседуваат над пет проценти во „ОИЛКО“ е Андреја Јосифовски, прв човек на „Макпетрол“. Тој поседува 14,98 проценти од акциите во „ОИЛКО“ каде поголеми акционери се „Макпетрол“ (35,61 процент од акциите) и „ОИЛКО“ која поседува 5,99 проценти од обичните акции.

Од друга страна, „Макпетрол“ поседува десет проценти од вкупниот број сопствени акции и освен „ОИЛКО“ нема друг поголем акционер кој има над пет проценти од акциите.

Акциите на „Макпетрол“ денеска на берзата се тргуваа по цена од 65.145 денари за акција.  

 

 

 

Во моментов нема коментари за веста. Биди прв да коментира...

Остави коментар