Веб-страницата за стриминг во живо во сопственост на „Амазон“ (Amazon.com Inc.), познатиот Твич (Twitch), е на пат да отпушти 35 отсто од својот персонал (околу 500 работници), според лица запознаени со плановите.
Кратењата, кои би можеле да бидат официјално објавени уште в среда, доаѓаат поради загриженоста за загубите во Твич и откако неколку директори ја напуштија компанијата во период од неколку месеци. Портпаролот на Твич одби да коментира.
Водењето на големата веб-страница, која месечно одржува 1,8 милијарда часа видеосодржини во живо, е енормно скапо, и покрај тоа што Твич се потпира на инфраструктурата на „Амазон“, велат од раководството на компанијата. Во декември извршниот директор на Твич, Ден Кленси, најави дека компанијата ќе престане со работа во Јужна Кореја, каде што трошоците се „неверојатно скапи“, се наведува во објава на блог.
Твич го зголеми својот фокус на рекламирање во последниве години. Девет години по преземањето на компанијата од страна на „Амазон“, бизнисот останува непрофитабилен, велат упатените извори, кои побарале да останат анонимни, бидејќи станува збор за приватни информации.
Во последните месеци од 2023 година неколку врвни директори го објавија своето заминување, вклучувајќи ги и главниот директор за производи на Твич, главниот директор за корисници и главниот директор за содржина. Твич го загуби и својот главен директор за приходи, кој работеше на платформата во рамките на одделот за огласување на „Амазон“.
Bloomberg
„И слатко и горко е чувството кога талентираните лидери ќе продолжат понатаму барајќи нови можности“, рече тогаш портпаролот на Твич. „Ние сме неверојатно благодарни за нивниот придонес за Твич и нашата заедница и им посакуваме сè најдобро“.
Сите поранешни вработени одбија да коментираат.
Откако ја презеде позицијата во март 2023 година, Кленси вложи голем напор во обидите на компанијата да ги поправи односите со познатите гејмерски лица што заработуваат преку стриминг на Твич. Многумина од нив беа лути на првичниот пристап на Tвич кон рекламите, кој компанијата го промени по критиките. Стримерите ја пофалија подготвеноста на Кленси да ги земе предвид нивните грижи по години поплаки дека услугата не е во чекор со потребите на своите корисници.
Сепак, новиот шеф се бореше да ги спречи загубите. Твич спроведе два круга отпуштања минатата година, кратејќи повеќе од 400 работни места како дел од поширокото намалување во „Амазон“.
Гигантот за онлајн трговија го започна своето најголемо отпуштање во 2022 година, кое опфати 27.000 позиции низ компанијата. Продолжи во октомври со нов круг на кратења во одделот за музика, кој вклучува платформа за аудиостриминг и дигитална продавница за песни.
.webp){kind=icon}
