Американските технолошки компании скратија 32.000 работни места од почетокот на годината

Технолошката индустрија ја започна 2024 година со уште еден бран на кратења на работни места, повлекувајќи се уште повеќе по широкораспространетите отпуштања минатата година.

Досега околу 32.000 технолошки работници ги загубија своите позиции во 2024 година, според „Лејофс“ (Layoffs.fyi), стартап што ги следи кратењата на работните места во индустријата уште од пандемијата.

„Снеп“ (Snap Inc.) стана најновиот пример, објавувајќи во понеделникот дека ја намалува својата работна сила за околу 10 отсто, или околу 540 вработени. Претходно овој месец, софтверската компанија „Окта“ (Okta Inc.) соопшти дека ќе елиминира 7 отсто од својот персонал за да ги намали трошоците, што ќе влијае на околу 400 вработени. Списокот продолжува, вклучувајќи и работодавци како „Амазон“ (Amazon.com Inc.), „Сејлсфорс“ (Salesforce Inc.) и „Мета“ (Meta Platforms Inc).

Годинава „технолошките компании сè уште се обидуваат ја коригираат превработеноста од напливот за време на пандемијата, имајќи предвид дека опкружувањето со високи каматни стапки и технолошкиот пад траеја подолго од очекуваното“, напиша основачот на „Лејофс“, Роџер Ли.

Според Ли, во последниве години има два главни брана на кратење на работни места. Порастот во „раниот ковид“, од првиот до вториот квартал на 2020 година, и ефектот од „покачувањето на каматните стапки“, кој трае од вториот квартал на 2022 година. „Годинава отпуштањата се помали и понасочени од отпуштањата пред една година“, рече Ли.

Иако економските фактори се главната причина за отпуштањата во технолошкиот сектор, Ли истакна дека многу компании ја наведуваат трката за вештачката интелигенција (ВИ) како фактор, бидејќи ги префрлаат ресурсите за да се фокусираат на талентите за ВИ. Според анализата на „Комп ТИА“ (CompTIA), која ги следи трендовите на вработување во технолошката индустрија, огласите за работа во сферата на „вештачката интелигенција или потребните вештини за ВИ се зголемија за околу 2.000 од декември до јануари, на 17.479“.

Така, иако индустријата отпушта од некои работни места, таа исто така агресивно вработува на други. Во јануари имало 33.727 активни огласи за работа, според „Комп ТИА“, најголем пораст од месец на месец во последните 12 месеци.

„Чувствувам дека повеќето од отпуштањата се случија и компаниите ќе почнат да се консолидираат“, рече Берт Бин, главен извршен директор на компанијата за персонал „Инсајт глобал“ (Insight Global). „Но сè уште е многу неизвесно“. Тој очекува пазарот да остане таков следните два квартала, „додека Фед навистина не почне да ги намалува каматните стапки“.